البامي عمدة طنجة اللي هارب خاص اقالتو لهاد السبب. الليموري راه عندو اقامة فالصبليون والقانون واضح: الإقالة فورا .

مصدر الصورة

كود سعيد الشاوي طنجة ////

عمدة طنجة البامي منير الليموري هارب. دار تصريح ولكن كيفكرنا بشحال من واحد قبلو. هارب بسباب صيكان وراق الانتخابات فمدرستي القدس وعباس السبتي بكاسا باراطا بمقاطعة السواني بطنجة نهار الانتخابات التشريعية 23 شتنبر.

العمدة هرب من باب سبتة وعائلتو الصغيرة مشات من طنجة المدينة حسب ما نشرته “برلمان” للي وضحات ان مراتو سهام المرابط وبناتو ب3 بيان ونور وهيام كلهم مشاو فالوقت اللي هرب فيه العمدة ولكن هما خرجو من طنجة المدينة لطريفة.

حسب معطيات عند “كود” العمدة يقدر يكون فكاطالونيا وبالضبط ب”بلايا دي اروس” حدا الحدود الاسبانية الفرنسية. ولكن علاش كاين هنا؟ لان العمدة حسب مصادر مطلعة عندو الاقامة فالصبليون.

الغريب ان السلطات فراسها باللي عندو الاقامة وما طبقاش عليه القانون. القانون التنظيمي رقم 113.14 المتعلق بالجماعات، وتحديداً المادة 13 منه، فيه باللي يحظر انتخاب أعضاء مجلس الجماعة المقيمين خارج أرض الوطن كرئيس للمجلس أو نواباً له لأي سبب من الأسباب. يهدف هذا المنع التشريعي إلى ضمان التفرغ التام لإدارة الشأن المحلي وتفادي عرقلة السير العادي للمرافق العمومية الجماعية.

والمادة 69 واضحة ما فيها نقاش “لا يجوز ان ينتخب رئيسا او نائبا للرئيس أعضاء مجلس المدينة الذين هم مقيمون خارج الوطن لاي سبب من الاسباب.

وتضيف المادة انو “يعلن فورا، بقرار السلطة الحكومية المكلفة بالداخلية، بعد رفع الامر اليها من قبل عامل العمالة او الاقليم، عن اقالة رئيس المجلس او نائبه الذي ثبت، بعد انتخابه، انه مقيم في الخارج”

وعليه فمنير الليموري حاصل على الاقامة فاسبانيا وخاص تطبيق القانون فحالتو