كود – طنجة //

مزال اليوم السبت كتكبار التطورات القضائية والأمنية المرتابطة بملف الأوراق الانتخابية اللي تشدات فمركز التصويت بمدرسة القدس بحي كاساباراطا فطنجة، نهار23 شتنبر الجاري.

وحسب معطيات متداولة ، تقدمو اليوم 5 الناس قدام محكمة الاستئناف بطنجة، من بعد ما خضعو للأبحاث اللي دارتها المصالح الأمنية تحت إشراف النيابة العامة المختصة.

ر وفق نفس المعطيات، 4 منهم كاينين رهن الاعتقال ، اما الخامس متبوع فحالة سراح، فانتظار القرار اللي غادي تاخدو النيابة العامة بخصوص الوضعية القانونية ديال كل واحد فيهم.

وفنفس اليوم جات لطنجة لجنة تفتيش من الداخلية، باش تفتح بحث إداري على كيفاش وقعات الواقعة.

وكيهم هاد البحث الأوراق اللي تضبطات فمركز مدرسة القدس، ومصدرها والطريق اللي دازت منو حتى وصلات للمركز، زيد عليها التحقق من الكاشي لي كان مورا لوراق واش صحيح ولا مزور.

ومازال الملف مفتوح على تطورات جديدة، خصوصا مع استمرار البحث القضائي والتفتيش الإداري، فانتظار ما ستسفر عليه التحقيقات والخبرات والقرارات اللي غادي تتخذها النيابة العامة والجهات المختصة.