گود – خنيفرة //

خرج اليوم الاتنين 28 شتنبر 2026كثر من 140 خدام بمنجم عوام فمسيرة احتجاجية، على قبل موت ثلاثة العمال فحادث منجمي المنجم، وسط مطالب بفتح تحقيق جدي فظروف السلامة المهنية وتحديد المسؤوليات، المحتجون طالبو بإجراءات كتضمن ليهم الحق فخدمة آمنة وكتحفظ سلامتهم وكرامتهم وحقوقهم.

وفهاد السياق صرح لگود “محمد بوتخساين”، الكاتب المحلي للكونفدرالية الديمقراطية للشغل بإقليم خنيفرة، بلي كثر من 140 خدام شاركو فمسيرة عمالية انطلقت من مريرت فاتجاه مناجم عوام، قبل ما يقصدو خنيفرة، احتجاجا على موت ثلاثة عمال تابعين لشركة مناولة وسط منجم بير الجديد.

كيف ما وضح بوتخساين لـ”گود”، أن هاد التحرك جا من بعد اجتماع عقداتو المكاتب النقابية التابعة للكونفدرالية الديمقراطية للشغل، قطاع المناجم، خصوصاً فظل وجود عدد كبير ديال شركات المناولة اللي كتخدم مع الشركة الأم “تويسيت”.

وبخصوص الحادث اللي قتل حياة ثلاثة عمال، طرح المسؤول النقابي تساؤلات على طبيعة الأشغال اللي كيقومو بها عمال شركات المناولة وسط المناجم، كيف دعا لفتح تحقيق لتحديد طبيعة المهام اللي كيتكلفو بها، خصوصاً وسط الأنفاق.

وقال “بوتخساين”أن التحقيق خاصو يوضح واش عمال المناولة كيدخلو للأنفاق وكيديرو أشغال مرتبطة مباشرة بالأعمال المنجمية، ولا كيتكلفو غير بأشغال الإعداد والتجهيز قبل ما يدخل العمال المنجميين التابعين للشركة الأم.

وضاف أن الحادث الأخير، حسب المعطيات اللي توصلات بها النقابة، ما خاصوش يتشاف بمعزل على حوادث أخرى عرفتها المنطقة على مدى سنوات، وقال بليهاد الحوادث تسببات، وفق تقدير النقابة، فوفاة ما بين 24 و25 واحد.

وأكد بوتخساين لگود أن النقابة اعتبرت موت العمال الثلاثة مناسبة لـ”دق ناقوس الخطر”، سوا فالتواصل مع مسؤولي الشركة أو مع السلطات المحلية، وشار بلي المكتب المحلي للكونفدرالية الديمقراطية للشغل بخنيفرة سبق ليه وجه مراسلات لعدد من الجهات بخصوص ظروف الصحة والسلامة المهنية فمناجم جبل عوام.

وذكر المسؤول النقابي أسماء عدد من شركات المناولة، من بينها “ووركمين” و”غولدمين” و”تيكترا”،و دعا لفتح تحقيق معمق فطبيعة الأشغال اللي كديرها هاد الشركات، خصوصاً وسط الأنفاق، وتحديد المسؤوليات وظروف اشتغال العمال.

وشدد على أن الهدف، حسب تعبيرو، هو معرفة طبيعة الأشغال اللي كيتكلفو بها عمال المناولة، ومدى احترام شروط الصحة والسلامة المهنية، خصوصاً فالأشغال اللي كتسبق تدخل العمال المنجميين التابعين للشركة الأم.

وفآخر كلمة ليه لـ”گود”، قال بوتخساين إن النقابة، من بعد مجموعة من الاتصالات اللي توصلات بها، اختارت الحوار عوض التصعيد، وانه عطا توجيه للكاتب الإقليمي باش يكون حوار مع إدارة المنجم، بحضور مسؤولي الشركة والسلطات المحلية، لمناقشة جميع حيثيات الحادث وتحديد المسؤوليات.

وأكد أن النقابة، حسب تعبيرو، “ديال الحوار وأن الهدف من هاد المسار هو الوصول لتوضيحات على الحادث وظروف السلامة المهنية، فانتظار التحقيقات والإجراءات المرتبطة بالحادث.