كازا.. ها كيفاش دازت عملية التصويت الصباح فعين السبع الحي المحمدي.. إقبال باهت وغياب جيل زد وغير 30 فالمية من العيالات لي صوتو.. “كود” سولات كزاويين: واش مقتانعين بالحزب اللي صوتو عليه ولا شي حد أثر عليكم؟.. وها شنو  كان جوابهم .

أميمة عطية – كود كازا ///

من 8 ديال صباح اليوم الأربعاء 23 شتنبر، بدات عملية التصويت فالانتخابات التشريعية بمختلف مكاتب الاقتراع، فالمغرب، “كود” تنقلات للمكتب الموجود بمؤسسة شفشاوني الابتدائية بدائرة مقاطعة عين السبع الحي المحمدي فكازا باش تنقل لكم الأجواء ديال هاد النهار لي كيتسناوه لمغاربة كل خمسنين.

الأجواء فالصباح كانت هادئة، وسط حضور السلطات المحلية واالبوليس دالمنطقة باش يواكبو عملية فتح المكتب واستقبال الناخبين لي جايين يصوتو .

مصدر الصورة

وحسب ما عايناتو “كود” خلال الجولة الصباحية بالمؤسسة لحدود ساعة التانية بعد زوال، فالإقبال على التصويت فهاد المكتب ما كانش كبير، وكانت الحركة داخل واحد مركز الاقتراع محدودة مقارنة مع عدد الناخبين المسجلين.

حنان أبو ناهي، مديرة مؤسسة شفشاوني الابتدائية، أكدت لـ“كود” أن الأجواء حتى حدود الساعة كانت ملائمة، موضحة أن المؤسسة دارت الاستعدادات والإجراءات اللازمة باش تسهل على المواطنين عملية التصويت.

وفتصريحها لـ”كود”، كالت المديرة إن أبواب مكاتب التصويت غادي تبقى محلولة من 8 ديال الصباح حتى 7 ديال العشية، باش يكون عند الناخبين الوقت الكافي باش يمارسو حقهم فالتصويت.

مصدر الصورة

وحنا داخل مكاتب التصويت لي منعو الصحفيين أنهم ادخلو ليها ولكن ’’كود” حاولات تلتقط بعض الصور كيبان ان كلشي غادي بنظام وسرية تامة وأعضاء لجنة التصويت او المراقبة تابعين لمواطنين خطوة بخطوة، رجال بزاف كيدخلو المخفر الأسود لي كيخرج منو الأمل بالألوان والعيالات بنسبة قليلة تابعينهمً صوتو وسالاو ومنين خرجو طرحت “كود” على عدد منهم سؤال: واش الاختيار ديال الحزب اللي صوتو عليه نابع من قناعة شخصية، ولا كاين شي تأثير من المحيط عليهم؟

واحد السيد، فايت ستين عام، كال لـ“كود” إنه ديما كيصوت، وهاد المرة حتى هو جا باش يمارس حقو، مؤكدا أنه مقتانع بالحزب اللي اختار يصوت عليه، حيث كيتمنا، حسب كلامو، يكون عند هاد الحزب دور فخدمة الشباب.

مصدر الصورة

وكال المتقاعد البيضاوي إنه فالاختيار ديالو ما قدر حتى واحد يأثر عليه، لأنه كيعتبر أن القرار فالأخير خاصو يكون شخصي.

وفي المقابل، مواطن آخر صرح لـ“كود” أنه جا يصوت حيت كيعتبر التصويت واجب، موضحا أنو فالبداية كان محتار بين جوج أحزاب، ولكن من بعد تشاور وقارن، قرر يعطي صوتو للحزب اللي شافو، حسب تقديرو، أكثر مناسبة.

ومن خلال المعاينة الميدانية ديال “كود”، كان الحضور ديال جيل زد باهت، فيما بان أن أغلب اللي حضرو فالساعات الأولى كانوا من المواطنين المسنين.

وفهاد السياق، هضرنا مع شابة مهندسة جات حتى هي لمكتب التصويت، وسولناها واش الاختيار ديالها مبني على قناعة ببرنامج الحزب اللي صوتات عليه، ومكاينش شي تأثير من شي جهة.

الشابة كالت لـ“كود” إنها خذات الوقت الكافي باش تقرا البرامج وتقارن بينها، مؤكدة أن اختيار الحزب اللي عطاتو صوتها خاصو يكون مسؤولية شخصية، وما خاص حتى واحد يأثر على اختيار الآخر.

مصدر الصورة

وبالنسبة لحضور الشباب والعيالات فعملية التصويت، اعتبرت المتحدثة أن العدد اللي شافت فالصباح قليل، وخصوصا الشابات، مشيرة إلى أن المغرب اليوم فـ2026، وما خاصش ابقا فيه تمييز بين الرجل والمرأة، وإنما خاص يكون تكافؤ فالفرص والمشاركة.

ومن جهة أخرى، وحسب معطيات حصلات عليها ” كود” مرتبطة بنسبة المشاركة فدائرة عين السبع الحي المحمدي، فإن نسبة المشاركة بلغت حوالي 45 فالمائة، مع تسجيل فرق فالحضور بين الرجال والعيالات، بحيث الرجال وصلو لخمسين فالمية لي اصوتو ولعيالات باقي تلاثين فالمية.

وفجولة “كود”، كان حتى مشهد آخر لمرا كبيرا فالعمر جات لمكتب التصويت مع عائلتها، واللي رفضو انها تصور معانا ولكن فحديثنا معاها سولناها علاش كتصوت واش فاهمة اشنو واقع .

السيدة فجوابها لـ”كود” كالت إنها من أيام الاستعمار وهي كتصوت و أن التصويت بالنسبة ليها عادة تربات عليها من بكري، وأنها كانت ديما كتسمع وتفهم قبل ما تمشي تعطي صوتها.

وسولناها واش فاهمة العملية الانتخابية وعلاش جات، جاوبات بأنها عارفة علاش جات، وأنها جات بنيتها باش تصوت وتمارس حقها، بعدما كانت العائلة مرافقة ليها فهاد العملية.

وهاكدا، وحتى حدود هاد الساعة باقي الأجواء فهاد المكتب فعين السبع هادئة، وسط إقبال محدود حسب ما عايناتو “كود”، فمقابل غياب لافت للشباب وجيل زد، فيما بقات الساعات المتبقية من النهار مفتوحة على احتمال ارتفاع وتيرة الإقبال قبل مايتسوى مكاتب التصويت مع السابعة ديال العشية.