جهة بني ملال خنيفرة عزيزة عليا مني كنت وزير"... أخنوش من أزيلال: اختارو لى كيطبق البرامج وينزلها .

كود – أزيلال//

“5 سنين ديال الحكومة، الدعم الاجتماعي، السكن، الصحة والتعليم.. بهاد الحصيلة دخل عزيز أخنوش لأزيلال وهو كيراهن على ثقة الناخبين باش يعطيو الأحرار ولاية حكومية ثانية”.

رئيس الحكومة وعضو المكتب السياسي لحزب التجمع الوطني للأحرار قال، فلقاء تواصلي بأزيلال، بلي واثق من قدرة حزبو على الرباح فالانتخابات الجاية، واعتبر أن الحصيلة الحكومية وثقة المواطنين هي اللي كتعطيه هاد الثقة.

أخنوش دافع على تجربة الأحرار فالحكومة، وقال بلي 5 سنين ديال تدبير الشأن العام ماكانوش ساهلين، وكانت فيهم بزاف ديال المشاكل، ولكن الحزب، قدر ينجز كل ما كان ممكن يتحقق.

مصدر الصورة

وشار عزيز اخنوش بالخصوص لبرنامج الدعم الاجتماعي المباشر، اللي وصل للفئات الهشة والفقيرة، والتأمين الإجباري على المرض AMO، واعتبر أن تنزيل هاد الأوراش كيمثل واحد من منجزات الولاية الحكومية لي فات .

وزاد أن الإصلاحات ماهمّاتش غير الفئات الهشة، ولكن حتى الطبقة المتوسطة، اللي استفدات من دعم السكن، وإصلاحات فالتعليم، اللي قال إنو ولات عندو جودة.

وفالصحة، شار أخنوش لإصلاح وتوسيع عدد من السبيطارات، خصوصاً فجهة بني ملال–خنيفرة وأزيلال، مع انتظار افتتاح سبيطارات جديدة.

وبالنسبة لأزيلال، قال بلي المنطقة عرفات تحول مهم فالولاية الحكومية، خصوصاً فـ الما والسقي والفلاحة وتربية الماشية، كيف شار للدعم اللي استفادو منو الكسابة.

مصدر الصورة

وعبر أخنوش على الفرحة ديالو بالتواجد فأزيلال، وقال بلي جهة بني ملال–خنيفرة عزيزة عليه بشكل خاص، خصوصاً من أيام كان وزيرا للفلاحة وكان كيزورها باستمرار.

ودعا الساكنة باش تمشي بزاف تصوت نهار 23 شتنبر، وتختار الناس اللي قادرة تنفذ الوعود والبرامج، وضاف أن “أهم حاجة فالاستراتيجيات هي التنزيل، وماشي الاستراتيجيات بوحدها.”

وفالأخير، دافع أخنوش على مرشحي الأحرار فالجهة، واعتبرهم ناس معروفين بـ”المعقول”، وأكد أن الحزب غادي يبقى وراهم ويدعمهم باش يدافعو على مطالب الساكنة.