واش بصح كاينيا تجاوزات لمفتشي الشغل لصالح مالين الشركات فوجدة وكيفاش السكوري محاضيش شغلو؟.. المدير الجهوي للشغل بوجدة لـ"گود": اللا كذوب وللي عندو شي ملف يمشي يشكي للمؤسسات.. و"كود" عندها تسجيلات جديدة لمشتكية كتأكد بلي تظلمات فضوسي ديالها .

مصدر الصورة

كود الرباط//

نفى المدير الجهوي للشغل بالجهة الشرقية، رشيد الخطابي، في اتصال مع “گود”، وجود أي تجاوزات من طرف مفتشي الشغل تخص ملفات لمستخدمين ضد مشغلين ديالهم.

الخطابي قال لـ”گود” بلي لي عندو شي مشكل معين راه يمكن ليه يدير الشكايات للمؤسسات المعنية، مشيرا بلي جهاز مفتشية الشغل فيها أطر وكتشتغل بكل تفاني، واللي كيقول العكس يثبتو بالوثائق. معبرا عن دعمه لمفتشي الشغل.

الخطابي، يضيف، بلي من حق مفتشي الشغل يمشيو للقضاء ضد أي إساءة لهم او تشكيك ف عملهم.

وفي إطار البحث والتحري، كود، عاودت اتصلت وسولات مصادرها، وحصلت على تسجيلات صوتية جديدة كتأكد بلي كاين خلل ف تعامل مع ملفات الصلح بين المشغل والأجير، كيفاش أن الأخير كيلقا راسو الحلقة الأضعف بسباب طريقة تدبير ملفات ومشاكل المستخدمين.

وكانت كود نشرت مقال صباح، فيه بلي وزير الشغل والإدماج المهني، البامي يونس السكوري، عايش فعالم موازي، الهضرا كثيرة والخدمة قليلة، وهادشي بان غي ف الأرقام الصادرة عن مندوبية التخطيط ف التشغيل مع ارتفاع البطالة وغياب مراقبة للشركات والفاعلين الاقتصاديين ف حماية المستخدمين وتوفير شروط عمل تخليهم يستمرو.

وطبعا أكبر مثال على فشل السكوري، هو معامل الكابلاج ف طنجة قنيطرة ومكناس وو، بزاف هربو من الخدمة بسباب “العبودية” للي كتمارس على المستخدمين، نفس الشيء بالجهة الشرقية.

وفق مصادر من وجدة هضرات مع “كود”، هو كيفاش مفتشي الشغل لي تابعين للسكوري ولاو متحالفين مع صحاب الشكارة ضد شكايات المستخدمين، كأن القانون دار ماشي باش يحمي المستخدمين بل يزيد من طغيان بعض مسيري الشركات.

معاناة ضحايا المشغلين بوجدة مع مفتشي الشغل، تضيف نفس المصادر، فتزايد، فبدل الوقوف الى جنبهم يتم اللجوء الى طرق ملتوية لصالح المشغلين من اصحاب الشكارة.

واحد ضحية، وفق تسجيل صوتي توصلت به “كود”، استدعيت لجلسة الانصات حيث كانت تنتظر انصافها في حين تتفاحىء بإرسالها لمنزل احد اثرياء المدينة للتفاوض معه ومقبلش الشكوى ديالها.