الأحرار فأول نهار د الحملة الانتخابية.. أخنوش من مديونة: بنسليمان ديال سيدنا وماشي ديال شي حد.. ولهضرا على شكون غيدخل للأغلبية سابقة لأوانها .

أميمة عطية – كود كازا ///

فأول نهار ديال الحملة الانتخابية لحزب التجمع الوطني للأحرار، اليوم الخميس 10 شتنبر بمديونة فكازا، وقبل من الانتخابات التشريعية المقررة فـ23 شتنبر، كلاشا رئيس الحكومة عزيز أخنوش القيادي البامي ورئيس الجامعة الملكية المغربية لكرة القدم فوزي لقجع، خصوصا فموضوع الوعود المرتبطة بكرة القدم وتيران بنسليمان.

وفكلمتو للحزب كال أخنوش، فخطابو، إن الأحرار حزب كيوفي بالوعود، وبلي البرنامج الانتخابي ديالو واقعي وقابل للتنزيل، مستحضرا البرنامج اللي سبق للحزب ونفذ جزءا منو بعد انتخابات 2021.

وفالمقابل، انتقد أخنوش الوعود اللي كتقدم للمغاربة وما كتتحققش، وكال فرسالة موجهة مباشرة لقجع إن الوعد ماشي هو تقول للمغاربة غادي تربح كأس إفريقيا للسيدات ثلاث مرات وما تحققش هاد الشي، أو توعد بالفوز بكأس إفريقيا 2025 أو لعب نهائي كأس العالم وما توصلش لهاد النتائج.

وزاد أخنوش جبد ليه ملف تيران، بنسليمان، وكال إنه كان شاهد على أن الملك محمد السادس هو اللي اختار المكان اللي غادي يتقام فيه الملعب الكبير ببنسليمان، فإشارة واضحة لرفض تقديم هاد المشروع للمواطنين على أنه إنجاز شخصي أو حزبي.

وفسياق آخر، ضاف أخنوش أن الفلوس اللي كتتصرف فلبني ديال تيران هي فلوس الدولة، يعني من مداخيل الإدارة والضرائب اللي كيخلصوها المواطنين.

وفموضوع نهائي كأس العالم 2030، هاجم أخنوش الوعود اللي كتقول إن النهائي غادي يتلعب فملعب بنسليمان، مؤكدا أن المغرب مازال ما تكلمش فهاد الموضوع مع حلفائه فتنظيم المونديال، إسبانيا والبرتغال.

مصدر الصورة

وقال أخنوش فهاد السياق: «مبغيناش تجبدو لينا الصداع مع حلفائنا»، مشددا على أن هاد القرارات ما خاصهاش تتحول لوعود انتخابية، حيث كتهم تنظيم مشترك بين المغرب وإسبانيا والبرتغال.

وبلغة أكثر مباشرة، قال أخنوش: «حنا مقصرين، بغيتو الكرة حنا موجودين، بغيتو السياسة حنا موجودين، بغيتو التنمية حنا موجودين».

ومع اقتراب موعد الاقتراع، وجه رئيس الأحرار رسالة لأنصار الحزب باش يكملو الحملة والتواصل مع المواطنين، مؤكدا أن «الحساب» غادي يبدا من بعد الانتخابات، وقال: «هذا وطننا، ويجب أن نحافظو عليه، ويوم 24 شتنبر يبدأ الحساب».

وفيما يخص التحالفات الحكومية، كال أخنوش لهضرا دابا على شكون غادي يدخل للأغلبية المقبلة سابقة لأوانها، بحيث خاص أولا نتائج الانتخابات، ومن بعد تعيين رئيس الحكومة من الحزب الفائز، ثم انطلاق المفاوضات مع باقي الأحزاب لتشكيل الأغلبية.

وزاد دعا مناضلي الحزب ما يحطوش خطوط حمراء فموضوع التحالفات، مستحضرا تجارب أحزاب حاولت تشكل الأغلبية بوحدها وقال عليها: «جابوها لاصقة».