شكون هو بوريطة حتى يگول لوزير خارجية الصبليون راه التوفيق ووهبي... كيهدرو بصفة حزبية. راه كذب وبان صغير والوزرا كيتكلمو بصفة حكومية وعلاش سكت باش ناضت الاحزاب ديالهم كتسب فالبلاد وكطاول على سيدنا .

مصدر الصورة

كود هناء ابو علي ///

مرة اخرى يفضل وزير الخارجية والتعاون ناصر بوريطة يتخبى. باش عطى تصريحات على لحريك الجماعي فسبتة ما خرجش باسمو. البارح خرج وزير خارجية الصبليون الباريس باش يقول للرأي العام ديالهم باللي تكلم مع بوريطة وسولو على تصريحات وزراءنا كيدافعو على مغربية سبتة ومليلية وكان جواب وزير خارجيتنا باللي هادوك كيهدرو بصفة حزبية ماشي رسمية حكومية.

اولا باش بوريطة يقول هاد الهدرة بلا ما يخرج يوضحها او يكذبها كتعني انو قالها بالصح. ثانيا شكون عطى لبوريطة الاذن باش يقول هاد الهدرة. راه احمد التوفيق وزير الاوقاف والشؤون الاسلامية هدر عليها فالعيد المولود اللخر قدام سيدنا. هو ما متحزبش. هدر بصفة رسمية ماشي غير كوزير بل كوزير للاوقاف والشؤون الاسلامية وكان كلامو قدام رئيس الدولة وامير المؤمنين.

اما عبد اللطيف وهبي فتكلم كوزير للعدل. خرج ورون الصبليون بتصريحاتو. باش هدر على استرجاع الموتى ثم الاطفال والبالغين ما كانش بصفتو كمسؤول فالبام. اللا. كان كيتكلم كوزير عدل.

اللي تحدث فالموضوع بصفة حزبية هو عبد الاله بنكيران امين عام العدالة والتنمية ونزار بركة ديال الاستقلال فلقاء بالرباط….. اما وهبي والتوفيق اللي ذكرو بمغربية سبتة ومليلية فهدرو بصفة حكومية.

سيدنا راه فخطاب سابق كان قال باللي سبتة ومليلية المحتلتين

بوريطة اللي ما عندوش الصفة يقول هاد لكلام. علاش هاد بوريطة سكت وما قال والو على السبان اللي سبوه كاع الاحزاب فالحكومة فالمعارضة يمينية يسارية. راديكالية. متطرفة….كلهم فالبرلمان سبو المغرب وتطالو على سيدنا. ما سمعناش بوريطة يحتج على هاد الشي وعلى حرق العلم المعربي وسط مدريد.

هاد بوريطة ديما مراطي الاحداث.