علمت “كود” من مصدر من تل أبيب أن الرحلة الافتتاحية ديال شركة “إسراير” بين تل أبيب ومراكش، واللي كان مرتقب تكون أول رحلة جوية مباشرة بين المدينتين، تعذر عليها الإقلاع اليوم الثلاثاء فالموعد المبرمج، بسبب عدم استكمال الترخيص من الجانب المغربي.

وحسب المعطيات اللي توصلات بها “كود”، فالرحلة كانت مبرمجة تقلع من تل أبيب اليوم الثلاثاء مع السادسة ديال العشية بتوقيت تل أبيب، على أساس توصل لمراكش مع 23:00 بالتوقيت المغربي.

وكان أكثر من 200 مسافر مغربي إسرائيلي حجزو بلايصهم على متن هاد الرحلة، اللي كانت غادي تكون أول رحلة مباشرة من تل أبيب لمراكش، بعد توقف هاد النوع من الرحلات لأزيد من 3 سنين.

وبالتالي، كانت هاد الرحلة المرتقبة غادي تشكل أول عودة للرحلات الجوية المباشرة بين تل أبيب ومراكش من بعد هاد المدة، قبل ما يتعطل إقلاعها بسبب بقاء الترخيص من الجانب المغربي قيد الانتظار، والوزير قيوح هو لي مسبب دبا فهادشي.

وحسب المعطيات المتوفرة، ل”كود”، فإن تأشير مديرية النقل الجوي (DTA) مازال ما كملش، وهو ما حال دون انطلاق الرحلة فالموعد المحدد.

وواحد من المسافرين خبر بعض صحابو بالوضعية، وقال ليهم: “يرجى أخذ العلم بأن وصول الرحلة الافتتاحية لشركة إسراير (ISRAIR)، القادمة من تل أبيب والمتجهة إليها، مبرمج اليوم الثلاثاء على الساعة 23:00، وفقاً للبرنامج الذي تم تعميمه من طرف MSC، مع الإشارة إلى أن ترخيص مديرية النقل الجوي (DTA) لا يزال قيد الانتظار”.

وجا تعثر هاد الرحلة فواحد الوقت اللي كان منتظر فيه تكون أول رحلة مباشرة بين تل أبيب ومراكش من بعد أكثر من ثلاث سنين ديال التوقف، فإطار العلاقات اللي تعاودات بين المغرب وإسرائيل ضمن اتفاقيات أبراهام.

وإلى حدود الساعة، مازال ما توضحاتش الأسباب اللي خلات الترخيص يبقى عالق، في انتظار توضيحات من وزارة النقل واللوجيستيك والجهات المغربية المختصة حول مآل الرحلة وموعد استئناف هاد الخط الجوي.