أرقام كبيرة فـCNSS: الاشتراكات سجلات 36 مليار والتعويضات 31 مليار درهم .

مصدر الصورة

كود -وكالات//

كشف الصندوق الوطني للضمان الاجتماعي CNSS على الحصيلة ديالو بأرقام كتعكس توسع كبير فعدد المنخرطين والمستافدين، ولكن طلوع مهم فعدد التعويضات والمصاريف.

فاجتماع مجلس إدارة الصندوق، تبين أن عدد الأجراء المصرح بهم وصل لـ4,24 مليون أجير، بزيادة 4 فالمية مقارنة مع 2024. وفنفس الوقت، طلعات كتلة الأجور المصرح بها لـ244,84 مليار درهم، مقابل 222,51 مليار درهم قبل عام.

أما الاشتراكات المستحقة، فوصلات لـ36,46 مليار درهم، بارتفاع 9 فالمية، أما التعويضات اللي صرفها الصندوق فإطار نظام الضمان الاجتماعي وصلات لـ31,5 مليار درهم، مقابل 29,7 مليار درهم فـ2024.

وفي إطار المراقبة ومحاربة التصريح غير القانوني، دار CNSS أكثر من 10 آلاف مهمة تفتيش ومراقبة فالعام، العمليات سالات بتسوية وضعية كثر من 151 ألف أجير، مع استرجاع مبالغ مالية مهمة.

وفي قطاع التغطية الصحية، وصل عدد المستافدين من التأمين الإجباري على المرض لأكثر من 25 مليون شخص، كيف ما تجاوزات التعويضات المصروفة فمختلف الأنظمة 22,65 مليار درهم، بزيادة 17 فالمية.

ولكن الرقم اللي كيشد الانتباه أكثر هو ديال نظام التأمين الإجباري على المرض الخاص بغير الأجراء، هاد النظام عرف ضغط مالي كبير، حيث وصلات نسبة التعويضات مقارنة مع الاشتراكات المحصلة لـ157 فالمية 2025، مقابل 132 فالمية ف2024.

أما نظام “أمو التضامن” فاستافد منو 3,95 مليون واحد، بصرف تعويضات وصلات لـ8,49 مليار درهم، كيف عرف نظام “أمو الشامل” ارتفاعاً كبيرا فعدد المؤمنين، اللي وصل لـ265.551 شخص.

هاد الأرقام كتبيّن بلي CNSS ولى كيتعامل مع عدد كبير من المنخرطين والمستافدين، ولكن فالمقابل كيزيد عليه الضغط المالي، خصوصاً فأنظمة التغطية الصحية.