البارح لاربعا 2 شتنبر 2026 ناس البام دارو لوبي كبير باش يدوز لقاء بنت الباشا فاطمة الزهراء المنصوري المنسقة الوطنية للقيادة الجماعية للامانة العامة للاصالة والمعاصرة، بسلا نظماتو مؤسسة الفقيه التطواني، مزيان. دار ليها كلشي باش تكون مرتاحة. لعب مهدي بنسعيد الوزير اللي خاصو يتحاسب سياسيا ومن طرف المجلس الاعلى للحسابات على فضايح منح مارشيات وزاراتو الشباب والاتصال والثقافة، لشركات ما فايتاتش 3 لدرجة انو عطى مارشي لمهرجان “راب افريكا” لشركة “دجيت سيت” ديال صاحبو بلا ما تفتح الاظرفة، هاد لوزير دار كلشي باش بنت الباشا ما تحرجش فالاسئلة. واخا هاد الشي كولو الانطباع الشخصي اللي خرجت منو ان المنصوري مرتابكة بزاف.

الارتباك لكبير بدا من السؤال على صحتها. عطات اجوبة ما عندها علاقة. السؤال اللي طرحو مدير “مدار 21” محمد بلقاسم كان على واش صحتها مزيان. يعني باش تاخذي رئاسة الحكومة او حتى منصب وزير خاصك تكوني صحيا قادرة تمارسي هاد المهمة. هنا المرة الاولى تهربات وقالت “صحتي العقلية مزيان” وزادت باللي مع السن ووو الركبة والعنق شوية عيانين. ثم مرة اخرى قالت باللي صحتها مزيان.

خاص الاحزاب السياسية تقتارح ان رئيس الحكومة يكشف على حالتو الصحية قبل تولي المنصب. راه منصب يحتاج لفيزيك مزيان. ماشي يكون الواحد رياضي ولكن خاصو يكون قادر يدير اجتماعات طويلة بتركيز كامل ويتنقل بلا مشاكل. هاد الشي ما كاينش فبنت الباشا وباعترافها هي. شفناها فالبرلمان كتجاوب گالسة. شفناها فاجتماعات كدوز وقت قصير وتخرج.

بنت الباشا باش صفقات بحال شي ولد صغير جابو ليه كادو باش قالت ليها نعيمة لمباركي واش ممكن تكوني اول رئيسة حكومة. باغية تتعين فهاد المنصب واخا ايلى ربح حزبها ماشي هي اللي سباب. لا برنامج واخا كذبات وقالت راه كان موجود قبل وتراجعات وقالت راه فوزي لقجع شافو ودار شي تعديلات فشي ارقام. واخا كذبات باش قالت باللي اختيار المرشحين دار قبل ما يلتاحق لقجع وقياديين من حزبها اكدو ل”كود” باللي كان لفوزي دور كبير فعدد من الدوائر خاصة اللي فيها مشاكل وما كانش للحزب حظوظ فيها. القيادي قال باللي كان ليه لقاءات كثيرة قبل ما يعلن التحاقو بالبام وباللي لولاه ما كان غادي للبام هاد العدد لكبير من احزاب خاصة التجمع الوطني للاحرار.

غير هي عقدة بنت الباشا اليوم هي فوزي لقجع. كل واحد ممكن يدير تمرين قصير. شحال من مرة جبداتو. باينة مهووسة بيه. هي اللي كانت ضدو فالسابق وسبق ليها هاجماتو كيف تنشر فكود هادي سنوات، اليوم كتناقض مع هجومها السابق وكتقول باللي راه كفاءة وجاي باش ما ياخذ بلاصة حد.

المنصوري غادية تكون قبل ما توصل للقاء ديال البارح شافت لقاءو فصفرو وشحال من واحد حضر ليه. غادية تشوف اليوم فبركان اللي حلفات حتى تحضر ليه باش تعرف حجم الشعبية عندو وتقيس بيها شعبيتها.

حاولات ترجع التحاقو حدث عادي. اختارت ما دافعش عليه باش هاجمو التجمعي رشيد الطالبي العلمي. هاد الشي كولو كيبين الهواجس ديالها اليومية منو. راه اكبر معيق للبام اليوم باش يربح هو المنصوري وبنسعيد وشي اعضاء فالمكتب السياسي معروفين بماضيهم اللي كلشي الا يكون بيض.

فرق كبير بين وحدة حتى باش تنظر كتكون ضعيفة وبين واحد كيتحرك فالتيران وضابط شغلو. فحوارها وباش تعرفوها تالفة، قالت باللي هي راس الحزب وتم انتخابها وباللي ما كاين لا مؤتمر استثنائي لا غيرو. باش تسد الباب على كلشي. اي ايلى ربح الحزب وماشي بسبابها هي، غادي يعين الملك الراس الاولى فالحزب الفائز. سيدنا غادي يطبق الدستور وبنفس ديموقراطي ولكن خاص الاستحقاق.

بنت الباشا وسط فضيحة كبيرة ديال تضارب المصالح فتسلطانت وما تطرحش عليها حتى السؤال. بلا ما ننساو الحالة الصحية راه مهمة بزاف. الكفاءة راها بكل عيوبها غادية تكون احسن من بن عرفة واخا هو مادي وجايب فالسياسة كثر منها.

راه تسلطانت ارض فلاحية حدا مراكش فيها 66 هكتار وتحولات من ارض فلاحية لفيلات وتباعت ب266 مليون درهم حسب تسريبات جبروت من بعد نشرات “لوديسك” باللي كان تلاعب بخطط التهيئة. زلزال كبير ما تجبدش فساعتين ديال الهدرة كيف ما تجبداتش سبتة ومليلية ولحريك الجماعي نهار عيد العرش. بنت الباشا عايشة فعالم موازي وصافي