السباق الانتخابي ديال 2026 بدا كيسخن، وحزب الأصالة والمعاصرة حط الوراق ديالو كاملين فوق الطابلة ببرنامج فيه 5 ديال المواثيق و20 التزام، ومركز بزاف على لغة الأرقام والقرارات الاجتماعية المباشرة اللي كتقيس الجيب ديال المواطن.

بخصوص الجيب والقدرة الشرائية ديال المغاربة، البام كيتعهد بلي أية أسرة مستفيدة من الدعم الاجتماعي المباشر غادي تضمن على الأقل 1.000 درهم شهرياً كحد أدنى. وفي نفس الوقت، موجه خطابو للمتقاعدين بشعار “لا معاش دون 3.000 درهم بعد الآن”، يعني تحييد أي تقاعد قل من 3.000 درهم باش المتقاعدين يواجهو غلاء المعيشة.

وملي كنوصلو للضريبة على الدخل (IR)، البام اقترح اعفاءات على اقتطاعات الأجور. الخطة هي نقص الأشطر الضريبية من 6 دالأشطر لـ 3 أشطر فقط. واللي مهم بزاف هو أن أي واحد كيشد صالير خام قل من 15.000 درهم شهرياً (اللي هي تقريباً 12.500 درهم صافية) غادي يتعفا من اقتطاع الضريبة بـ 0%. أما اللي كيشدو بين 15.000 و46.000 درهم غادي تفرض عليهم 10%، وتبقى أعلى نسبة هي 20% (فبلاصة 37% اللي كاين حالياً) وغير للي عندهم أجورهم فايتا 46.000 درهم.

ولتحسين المعيشة ديال الأسر الضعيفة، البام دخل حتى لفواتير الماء والضو، وقرر يطبق مجانية فاتورة الكهرباء للأسر الهشة اللي عندها استهلاك محدود فحدود 100 درهم شهرياً، باش ينقص عليهم مصاريف الطاقة المباشرة.

أما على مستوى التشغيل وحرب البطالة، فالرقم الكبير اللي كيرفعو الحزب هو خلق 1.000.000 منصب شغل صافٍ باش تهبط نسبة البطالة لـ 7% فـ2031. هاد المليون فرصة مقسمة بين 250.000 منصب فالمصانع والصناعة، و360.000 منصب فالمشاريع والأشغال اللي مرافقة لتنظيم مونديال 2030، و270.000 منصب فخدمات الترحيل أوفشورينغ. وللشباب، كاين برنامج “أول عقد شغل” لـ 500.000 شاب، وتأهيل 300.000 شاب سنوياً من غير المتعلمين والعاطلين (NEET) عبر منصة “مسار إدماج”، ودعم 80.000 فلاح شاب بقروض بلا فائدة باش يستقرو فالعالم القروي.

واقترح البام كذلك تحفيزات للمقاولات الصغرى؛ أي مقاولة صغرى أنشأت 3 مناصب شغل دائم غادي تعفى كاملا من الضريبة على الشركات (IS) لمدة 5 سنوات متابعة، مع فرض نسبة قانونية ديال 15% من الصفقات العمومية تمشي بزز للمقاولات الصغرى والمتوسطة.