ساعات قبل ما يبدا وضع الترشيحات رسميا. ها علاش لقجع ما غاديش يترشح للبرلمان .

مصدر الصورة

كود الرباط//

علمت “گود” من مصادر بلي عكس ما كان متوقعا بترشيح فوزي لقجع، عضو المكتب السياسي لـ”البام” والوزير المنتدب المكلف بالميزانية، فالدائرة الانتخابية لمدينة بركان، لقجع موحال يترشح، فهاد الدائرة.

وحسب مصادر مقربة ل”كود” فالقرار تحكمات فيه اعتبارات اهمها ترشح زوجتو هدى امغاري كوكيلة لائحة البام الجهوية بالشرق. لقجع حسب مصادر “كود” عندو موقف مبدئي. ما يمكنش يترشح مع مراتو فنفس الجهة. طبعا هدى امغاري راها عضوة فالمكتب السياسي للبام من 2020 ولقجع تضيف مصادر “كود” كيآمن بالقيم الديمقراطية وكيحرص “على تقديم نموذج سياسي وأخلاقي يقوم على عدم استغلال النفوذ والمواقع الحزبية كمدخل لتقاسم الترشيحات والمناصب”.

لقجع واخا عندو قدرة يربح مقعده برلماني ف بركان، اختار يخلي نفس الوجه للي هو محمد ابراهيمي، وهو صديق مقرب له، وعندو فيه ثقة كبيرة، نظرا للخدمة لي كيدير ف بركان، لقجع مبغاش يهرس وتيرة ابراهيمي وخلاه يكمل ف نفس الطريق.

قرار فوزي عدم الترشح، حسب مصادر كود، ينسجم مع دورو داخل البام واللي كيتمثل ف”التوجيه الاستراتيجي، سواء على مستوى العمل الحزبي أو على مستوى الطروحات والبرامج السياسية”. وكان عضو المكتب السياسي للتراكتور صرح كثر من مرة باللي هدفو “ضمان التوافق حول عدد من الملفات التي تعكس ما سماه هو نفسه مراراً «ممارسة السياسة بشكل مختلف” وباللي اهم حاجة بالنسبة ليه هو “المساهمة في إعداد برنامج للحزب يخدم مصالح المواطن المغربي، بعيداً عن منطق البحث عن المناصب” وباللي التحاقو حركو بالاساس رغبتو فتقديم “قيمة مضافة للحزب وللمواطن، وليس بالضرورة بالترشح أو تقلد منصب انتخابي”.

يشار بلي متوقع يمشي لقجع رفقة قيادات بامية باش يديرو تجمع حزبي حاشد بمدينة وجدة خلال الأيام القليلة الجاية، وهو المحفل التنظيمي لي غادي يعلنو فيه قيادات مواقف ضد الاحرار، للي كانو مؤخرا ف وجدة فلقاء كبير.

وغايجي لقاء وجدة مور التحركات السياسية المكثفة لي قادها لقجع فجهة سوس ماسة، وتاونات وعدد من المناطق، ولي وجه فيها رسائل سياسية واضحة كايأكد فيها بلي الدخول ديالو للمكتب السياسي للحزب كايجي فإطار ممارسة حقه الدستوري كمواطن، وبهدف التركيز على القضايا الاقتصادية والتنموية الحقيقية وبناء الثقة مع المواطنين والشباب بعيداً على السجالات الجانبية.

هذا، واعتمد البام خطة استمرار الوجوه بجهة الشرق بتعيين ابراهيمي وكيلا للائحة التراكتور ببركان، وهو صديق مقرب من لقجع، رضوان بوكطاية (جرادة)، وعبد القادر حضوري (وجدة أنجاد)، وعبد الرحمان السهلي (تاوريرت)، وحميد الشاية (فجيج)، ومحمد المومني (الناضور)، ومحمد البرنيشي (جرسيف).

وكان بلاغ لوزير الداخلية، قال لبارح السبت، بأن الفترة المخصصة لإيداع التصريحات بالترشيح برسم انتخاب أعضاء مجلس النواب ستبتدئ في الساعة الثامنة صباحا من يوم الاثنين 31 غشت الجاري وتنتهي في الساعة الثانية عشرة من زوال يوم الأربعاء 9 شتنبر 2026.