اليوم علن حزب الاصالة والمعاصرة على اسماء وكيلات اللوائح الجهوية 12 المخصصة للنساء. فيهم نساء ما يستحقوش. شي شفروه من الاحرار بحال بنت امحزون سارة فجهة بني ملال. امها كانت تجمعية وفيهم محاباة بحال ترشيح سلمى ابلحساين فجهة تطوان طنجة….

يمكن من الترشيحات المستحقة هي لهدى لمغاري المبرض. تستحق لحضورها فالمكتب السياسي لنشاطها فاجهزتو. اطار كبير فالمالية. فيها كاع الميزات للي ما عندش حتى المنسقة الوطنية للقيادة الجماعية للبام بنت الباشا فاطمة الزهرا المنصوري وفايتة فالقراءة فالفهامة فالمستوى الفكري والاكاديمي مهدي بنسعيد اللي حاطينو وزارات.

اليوم باش تعلن على اسم “لالة هدى” كلشي اختصرها باللي هي زوجة فوزي لقجع الوزير المنتدب المكلف بالميزانية والملتحق قبل ايام فالمكتب السياسي للبام. راه لالة هدى لمغاري عضوة فالمكتب السياسي لحزب الاصالة والمعاصرة من 2020 اييه 6 سنين هادي. كتخدم فلجان متخصة وساكتة. بعيدة على الاضواء.

هادي مواطنة دارت راسها براسها. تدرجات فوزارة المالية بكفاءتها. ما هي بنت الباشا ولا بنت مول الباش. خدمت ودمرت. تلاقات فالمالية باطار فمستواها اللي هو فوزي لقجع وتزوجو وولدو بنت وولد. ما يمكنش تنتاقص منها او من قيمتها. فالمالية كانت ديما كفاءة نزيهة وكتخدم بلادها.

البوسط ديالها وديال زوجها كبير قبل ما يولي فوزي مدير الميزانية، كانو ممكن يوليو ملايرية. بقاو عايشين عاديين لانهم نزهاء. حياتهم بسيطة وعطلهم بسيطة.

ما يمكنش نختاصرو لالة هدى ف”زوجة فوزي لقجع. راها كيان مستقل. واش ما دخلوش لعقلكم باللي هي عقل كيفكر بوحدو وقادر يتحمل مسؤولياتو. راها ظلمات فالبام غير تجنبا للقيل والقال، تستحق تدخل للحكومة وكيف قلنا حسن من وزراء ووزيرات دخلو على ظهر التراكتور.

لالة هدى ايلى نجحات راها كفاءة. غادية تغني لجنة المالية اللي تخصصها. غادية ترفع النيفو.