الأجواء مشقلبة ف بلادنا.. الحرنة مازال فشي بلايص والشتا والرعد والرياح القوية فهاد المناطق .

منذ

عمر المزين – كود///

المديرية العامة للأرصاد الجوية كتتوقع، بالنسبة لنهار داليوم الخميس، باش يكون الجو حار نسبيا حتى لحار محلياً فالمنطقة الشرقية، والجنوب الشرقي ديال البلاد، وداخل الأقاليم الصحراوية.

وفالليل والصباح، حسب المديرية، غادي تتشكل سحب واطية مرفوقة بالضباب فبعض السواحل والسهول المطلة على المحيط الأطلسي.

وفمنطقة طنجة، ممكن تنزل شوية ديال الشتا الخفيفة فالصباح، أو قطرات متفرقة، بينما ممكن تعرف مناطق شرق سواحل البحر الأبيض المتوسط، ومرتفعات الأطلس، وشمال المنطقة الشرقية والجنوب الشرقي، قطرات مطرية متفرقة ومرفوقة بالرعد.

ومن جهة أخرى، غادي تكون هبات رياح قوية نسبياً فالسواحل الوسطى، والمنطقة الشرقية، ومرتفعات الأطلس والسفوح الشرقية ديالها، وكذا فالأقاليم الجنوبية، مع إمكانية تطاير الغبرة فبعض المناطق.

وبالنسبة لدرجات الحرارة الدنيا، غادي تتراوح ما بين 24 و30 درجة فالجنوب الشرقي، وأقصى جنوب البلاد والجنوب ديال المنطقة الشرقية، وما بين 20 و23 درجة قرب السواحل، ووادي ملوية وشرق الساحل المتوسطي، بينما غادي تكون ما بين 15 و19 درجة فباقي المناطق.

أما درجات الحرارة فالنهار، فمن المرتقب تعرف ارتفاع طفيف فمناطق سوس وشمال الأقاليم الجنوبية، فحين غادي تنخفض أو تبقى مستقرة تقريباً فباقي مناطق المملكة.

وبالنسبة للبحر، غادي يكون قليل الهيجان حتى هائج فالواجهة المتوسطية، وهادي حتى قليل الهيجان فالبوغاز، وقليل الهيجان حتى هائج على طول الساحل الأطلسي.