رشيد الطالبي العلمي عضو المكتب السياسي لحزب التجمع الوطني للاحرار هاجم فتسجيل صوتي مسرب من اجتماع المكتب السياسي اللي كان اليوم وعن بعد ماشي حضوري، حزب الاصالة والمعاصرة.

بيان حزب لحمامة عكس هاد الشي. رئيس مجلس النواب فهاد المجلس المنتهية ولايتو، دخل فالاجتماع تقريبا علاين 10 دقايق. فيها اختار يضرب الرجل اللي معول عليه البام باش يربح الانتخابات. ما هاجمش لا فاطمة الزهراء المنصوري المنسقة الوطنية للقيادة الجماعية للتراكتور ولا مهدي بنسعيد للي فهاد القيادة ولا حتى هاديك الثالثة فالقيادة اللي ما كيعرفها حد، بل مشى لراس السوق فالحزب ديال الصح اللي هو فوزي لقجع عضو المكتب السياسي للحزب.

علاش الطالبي العلمي ختار لقجع ماشي لخراين؟

فوزي لقجع مارس حقو ينضم لحزب سياسي ويتحرك لهدف هو يربح الانتخابات. الاحرار كيتاهمو البام بالترحال السياسي. اي داو ليهم مرشحين وذكرو فالبيان 8 النواب والنائبات اللي غاديين يترشحو باسم البام واخا مازال مع لحمامة وجبدو حالة شباعتو عضو المكتب السياسي كاع اللي مشى للبام وللي هاد الحزب تكلف بتسويق بيانو اللي خرجو قبل قليل من هاد الليلة.

لكن اتهام ما شادش. اولا واش ضد القانون ولا اللا؟ ايلى كان غير قانوني يمكن يمشيو للقضاء وصافي. الطالبي العلمي عارف باللي ماشي غير قانوني وعليها جبدو عبارة تخليق الحياة السياسية.

هادي انتخاباب. البام باغي يربحها. الاحرار باغيين يربحوها. كل واحد كيوجد فرقتو باش يربح. البام كان غادي يطيح طايحة كبيرة كون بقى معول على المنصوري وبنسعيد. باش جا لقجع جاو للحزب عدد من اعيان جهات ومناطق المغرب. تقريبا نفس ما وقع باش اخنوش عزيز شد حزب الاحرار.

يعني ان فوزي لقجع ما دارش شي ممارسة “غير قانونية” او حتى “غير اخلاقية”. رجل ناجح فالمالية فالكورة ما يمكنش ليه ما ينجحش فالسياسة. عندو شعبية وعندو قدرة تواصلية كبيرة عليها اختار الطالبي العلمي يهاجمو.

طبعا هاد الهجوم ما يمكن الا يقوي لقجع. كلام القيادي التجمعي فيه هاداك الاحساس باللي مع لقجع البام عندو امال كبيرة يربح الانتخابات التشريعية.

فوزي لقجع مازال ما بداش. مازال كيسخن. الحملة مازال ما بداتش وحتى خرجاتو دابا كيهدر غير على ضرورة يكون عندنا مغرب ب”سرعة واحدة”. باش غادي يدخل فالماتش مزيان غادية تبدا لفراجة بصاح. عندو مواضيع كثيرة يقدر يقصح فيها منافسيه كلهم