في حالة كانت الأمور كتمشي بالمنطق والعقلانية في المغرب فراه خاص وهبي يكون هو رئيس الحكومة المقبلة في المغرب، ولكن للأسف الأمور مكتمشيش هاكا في البلاد، والانتخابات عمرها كانت الطريقة الصحيحة لايصال الإنسان المناسب للمكان المناسب، هاهي فاتت نص قرن والانتخابات كتدار في المغرب وهادوك لي كيتشكاو منهم الناس هوما لي كيربحوا، وشوف غير عدد المتابعات في حق المنتخبين، وشوف غير شنو تغير في البلاد أصلا بالانتخابات، راه يمكن نقول أن الديمقراطية من معيقات التقدم والتحضر في هاد البلاد، بحكم أننا كشمال افريقيين عمرنا عرفناها او عندنا تاريخ معاها، أو ناضلنا من أجلها، أو ناضلنا من اجل الحرية والفردانية ككل، حنا عبارة على جماعات وقبائل دات ولائات مبنية هلى أيتها حاجة من غير الكفائة بحكم أنها أصلا جاية من ناس أميين قبليين كيعيشو بقيم وإعتقادات ديال القرون الوسطى.

في الوقت لي الحكومة والأحزاب بقاو كيتسناو موظف في وزارة الداخلية يقرى البيان حول أحداث سبتة، راه وهبي هورالوحيد لي خرج في الاعلام العالمي وكان مقنع وبين على منطق وفهم كبير للقانون والدستور وعلم الاجتماع، وفي الوقت لي الحكومة مكمشة والمنتخبين في المغرب واقفين من ورى العمال والولاة والقياد، راه وهبي هو الوحيد لي كيحاول يحسن ويجود ويبدل حياة المغاربة للأحسن، عبر قوانين حداثية وللأسف بلا دعم الحزب ديالو او أعضاء الحكومة، بوحدو في مواجهة الجميع من أجل مستقبل المغاربة وبالخصوص الأجيال القادمة، وبوحدو لي مآمن بالحداثة والتحديث وكينظر ليها وسط البرلمان وبالدارجة ماشي بلغة الخشب ولعل وما فتئ وكان ولماذا.

أي خروج إعلامي لوهبي كيكون موفق فيه ويشفي الغليل، وقادر يواجه بالمنطق والحجة، بالاظافة راه هو أهم وزير عدل داز في تاريخ المغرب بالنسبة ليا، ورغم تصلب الدولة والحكومة وحتى أصوات الخوانجية وتابعيهم في المجتمع، وهبي بحال التران غادي نيشان باش يغير حياة المغاربة للأحسن بفضل القانون، سبقلي كتبت ان وهبي هو شيشرون ديال المغرب، بجوجهم محاميين وسياسيين خلاو أثر كبير، وكانوا كيتحاجوا بالمنطق والقانون، الفرق هو نهاية شيشرون كانت مأساوية، وفي حالة وهبي صعيب تكون كذلك، ولكن باش مايوليش رئيس حكومة مستقبلا راه نهاية مأساوية للمغرب والمغاربة، وعالله يوقع العكس ويخدم المنطق والعقل.