زلزال تنظيمي فالبيت الاتحادي: رجاء البقالي قدمات الاستقالة من المكتب السياسي واتهمت لشكر بلي كيرشح صحاب "الشكارة" ويهمش المناضلين .

مصدر الصورة

كود الرباط//

مع اقتراب موعد الانتخابات الجايا، شاعلة العافية فـالبيت الداخلي لحزب الاتحاد الاشتراكي للقوات الشعبية. القيادية الاتحادية، رجاء البقالي الطاهري، عضو المكتب السياسي، وجهات ضربة تنظيمية لادريس لشكر، بعدما قدمات الاستقالة ديالها الرسمية من جميع المسؤوليات الحزبية، وفضحت “طريقة توزيع التزكيات”.

وفـرسالة استقالة كتابية تحطات فوق مكتب الكاتب الأول للحزب، إدريس لشكر، أعلنت رجاء البقالي الانسحاب النهائي والكامل ديالها من كل المهام اللي كانت شادة داخل “الوردة”، وعلى رأسها العضوية ديالها فـالمكتب السياسي للحزب، والعضوية فـالمنظمة النسائية الاتحادية.

الاستقالة كان فيها تشخيص للوضع التنظيمي اللي كايعيشو الحزب. البقالي اتهمات قيادة الحزب بـ”إقصاء مناضلات الحزب” وحرمانهن من المنافسة الشريفة المبنية على الاستحقاق والكفاءة، مقابل فتح الباب واستقطاب أعيان ووجوه ما عندها حتى شي حضور سياسي، لا فـالساحة المحلية ولا الوطنية، فقط حيت متوفر فيها “منطق المال والشكارة”.

البقالي كشفات فـرسالتها بلي القيادة ضربات بعرض الحائط المساطر التنظيمية اللي سبق وتصوت عليها داخل أجهزة الحزب، خصوصاً الشروط الضابطة للترشيح اللي كاتحمي الأقدمية والتاريخ النضالي للمناضلين والفاعلين فـالجمعيات والنقابات، وهو الشي اللي كرس –حسب قولها– غياب الشفافية والتحكم الفوقي فـمنح التزكيات للانتخابات التشريعية.

وختمات القيادية المستقيلة الوثيقة ديالها بتحميل إدريس لشكر، بصفته الكاتب الأول والمسؤول الأول على هاد الوضع، المسؤولية المباشرة الكاملة على هاد الانحراف التنظيمي، مؤكدة بلي هاد الاختلالات هي السبب الرئيسي والوحيد اللي دفعها تحط الاستقالة وتنسحب بصفة نهائية.