ديما فين ماكتبدى الهدرة على الخلاص بلاكارط كيتجبد مول الحانوت هو اللول كأنه بوحدو لي معرقل هاد التحديث في المغرب، بينما الواقع هو أن الدولة هي لي معرقلاه وتقريبا أغلب قطاعاتها كيتخلصوا غير بالكاش، سبيطارات والمحاكم والكوميساريات والخزينة والجماعة والمقاطعة، وعند البوليس وجوندارم، الصبليون لي حدانا ولي شباب المغرب باغين يديرو هجرة جماعية ليها، راه البوليس فيها مكيشدوش الكاش نهائيا، كيوقفك عندك مخالفة كتخلص بلاكارط طبعا الفلوس كتبان في السيستيم وكتقلل من احتمال الرشوة او اختلاس الغرامات، وهادشي واقع في بزاف ديال الدول منهم لي ماشي متقدمة غير محاربة مع الوقت.

أولا خاص منع البوليس والجدارمية من استخلاص المخالفات نقدا، الخلاص خاص يكون بالبطاقة أو في مكاتب خاصة، وهادشي دايرينو اغلب الدول المتحضرة لي عندها مستوى النزاهة طالع، تحديث كاع قطاعات الدولة لي كتعامل بالفلوس نقدا، راه غير معقول تمشي للمحكمة وتبغي تخلص شي لعبة وخاص تخرج تيري وترجع، والأكثر عبثا من هذا هو السبيطارات، أنا نيت درت كسيدة ومشيت لسبيطار وكان خاصني نخرج لبرى نقلب على گيشي في الليل وانا مكرفص ونرجع للسبيطار بلش نخلص، راه تحديثات بسيطة تقدر تحسن جودة الحياة في المغرب وتسهلها، المغرب حاليا راه بلاد متخلفة بزاف مقارنة بدول عاشت نفس الظروف التاريخية ديالو وكانت غير في القريب العاجل افقر وكتعاني من الجوع مقارنة بالمغرب.

وللأسف مكاينش حتى شي إشارات أو علامات تلوح في الأفق على أن المغرب غادي يحدث قطاعات الدولة أولا، ويستافد من تنظيم كأس العالم، ويستافد أيضا من هاد الثخمة الاقتصادية والسياحية لي كتعيشها الصبليون وللأسف ماوصلنا منها والو واخا غير الفرتيت، وحتى الحياة العادية معقدة في المغرب بسباب القدومية ومقاومة التحديث، إييه المغرب واعر ومتطور مقارنة بموريتانيا ماشي مقارنة بالصبليون او أي دولة آسياوية عادية وفقيرة، كتلقى الحياة كلها ساهلة وكتعاش بالتطبيقات وغير من التيليفون، حنا باقي خاص تكاليزي وهاز معاك الفلوس، وسمحنا مكاينش الصرف سير خرج دور على الحوانت صرف باش تخلص تنبر في المقاطعة، نص دول العالم حتى الفقير منها كتبقى اغلب وسائل النقل كتخلص دابا غير بالتيليفون، طوبيس طاكسي ترام تران طيارة أيتها حاجة، في المغرب تعيط غير لواحد يوصلك عبر تطبيق كيتعرضو ليكم الطاكسيات لي باقي خدامين بتقنية ديال القرن لي فات، ويجيو البرليس يسولوك واش كتعرفوا، إلى متى هاد العبث.