واش جماعة كازا تخلات على الليدو؟ وفين طلب العروض الدولي؟ كيفاش دازت لافير من أكرم لبنسودة وشكون عندو يد فيها؟ .

گود كازا//

تتجه جماعة الدار البيضاء، نحو التراجع على قرار وضع عقار المركب الاصطيافي والسياحي والرياضي الجماعي “الليدو” المعروض عند بيضاوا بـ “براديس” فطلب عروض دولي، بعدما تقرر فدورة استثنائية سابقة لمجلس المدينة عام 2013، فسخ العقد مع شركة “بلان سييل” اللي مولاها هو عبد الاله اكرم الرئيس الأسبق للوداد الرياضي، وهذا التوجه الجديد ديال جماعة كازا، كايطرح شكوك وتساؤلات كثيرة واش هذا الشي فيه ارضاء الخواطر ولا كاينة شي جهات اللي داخلين على الخط؟ فالوقت اللي كانو فيه البيضاويين فرحانين وهما كايسمعو خبار استرجاع جماعتهم لعدد من ممتلكات مدينتهم اللي سنوات وهي كاتستغل اما بطرق غير مشروعة او بإخلال بشروط عقد الاستغلال.

وحسب ما توصلت به جريدة “گود”، فجماعة الدار البيضاء، عرفت خلال اشغال لجنة الممتلكات والتعمير بمجلس مدينة الدار البيضاء اليوم الخميس، نقاش حول توجه جماعة كازا خلال دورتها الاستثنائية المقبلة للمصادقة على صفقة جديدة لكراء مركب “الليدو”، وهذا الشي اللي كايطرح علامات استفهام كثيرة حول الهدف من هذا التوجه وسؤال كبير “واش جماعة الدار البيضاء تخلات على المركب؟”، وواش تخلات حتى على مقترح طلب عروض دولي له، بناء على كايّي د شارج بشروط جديدة، وهادي هي الفكرة اللي كانت بعد قرار فسخ العقد اللي كان مع أكرم فعام 2013.

مصادر “گود” كاتقول ان مجلس مدينة الدار البيضاء، ناوي خلال الدورة الاستثنائية المقبلة، يدوز كراء مركب “الليدو” من عند عبد الإلاه أكرم مول شركة “بلان سييل” لمحمد كمال بنسودة مول شركة “كالوا ش.م” بنفس شروط عقد الكراء السابق، وهذا الشي فبلاصة ما تدير الجماعة طلب عروض دولي لكراء المركب كيفما كان منتظر منها، وهنا سؤال آخر كايتطرح “واش الجماعة دارت الخاطر لأكرم او لجهات اخرى فهاد لافير؟”.

ودابا غادي اتطرح مسودة هذا القرار على الدورة الاستثنائية لمجلس جماعة الدار البيضاء المقبلة يوم 17 غشت 2026، من اجل المصادقة عليها، وهذا الشي غادي يخلق جدل كبير داخل جماعة كازا، خصوصا في ظل غياب عدد من اعضاء المجلس الجماعي بسبب العطلة الصيفية، مع العلم ان هاد الدورة جات بطلب من السلطات، زائد ان الانتخابات التشريعية قريبة وما بقى لها والو، واي بيضاوي او متتبع لسياسة المدينة غادي يبدا يسول علاش وكيفاش تم التراجع على طلب عروض دولي لهاد المركب بالضبط فحالة كملت العملية؟ وكيفاش داز الكراء ديالو من عند اكرم لبنسودة وبإشراف من جماعة الدار البيضاء، وفهاد التوقيت وبنفس شروط عقد الكراء القديم اللي كان كاري به اكرم؟ وشكون كايتحكم فهاد الشي؟

مصدر الصورة مصدر الصورة مصدر الصورة مصدر الصورة مصدر الصورة