واش المخابرات الجزائرية ورا هاد دعوات الاحتجاج الفايك؟ كازا حتى هما عاقو بالقالب الجزائري وما حضروش لوقفة "جيل زد ".. “كود” كانت فساحة السراغنة: البوليس محاصرين البلاصة وكلشي كيتسنى.. (صور) .

أميمة عطية ـ كود كازا ///

عرفات منطقة ساحة السراغنة فكازا، لبارح نهار الأحد 9 غشت 2026، مراقبة أمنية مشددة، كلشي كان مستعد من بعدما انتشرات أخبار على وقفة احتجاجية كبيرة دعات ليها إدارة “جيل زد” فالمغرب كامل.

مصدر الصورة
“كود” كانت حاضرة فعين المكان، والبوليس كانو بأعداد كبيرة، محاصرين الساحة والأماكن اللي محيطة بها، وسط انتظار لوقفة اللي كانت كتروج ليها السوشيل ميديا باسم “جيل زد”.

مصدر الصورة
الوقفة غادي تبدا مع الستة ديال العشية، وقبل منها البوليس والصحافيين حاضرين من الربعة ديال العشية.

مصدر الصورة

البلايص مراقبة، وكلشي كيتنومر، ضغط كبير، وكلشي كيتسنا واش غادي يبان شي تجمع، واش غادي يجيو وليدات “جيل زد” للساحة، وواش غادي تبان شي شعارات ولا لافتات، واش الفوضى غادا تكون؟

مصدر الصورة
ساعة دازت مور ساعة، والبوليس بقاو فبلايصهم ومحاوطين المكان، الناس غادية جاية، السوق عامر، القهاوي عامرين، والحركة مستقرة وما فيها حتا شك.

ومن بعد وقت طويل، تبين أن كلشي عاق بالقالب الجزائري، وحتى حد ما جا للوقفة.

مصدر الصورة

وهادشي كيحيلنا للبلاغ اللي سبق لإدارة “جيل زد 212” وخرجاتو، بحيت نفات فيه علاقتها بهاد الدعوات، وكالت إن التصاور والبلاغات والمحتويات اللي كتدور فالمنصات الاجتماعية ماشي صادرة عليها وأنها فايك.

وكانت المجموعة أكدت فالمقال اللي نشراتو “كود” باللي ما صدر حتى بلاغ رسمي ولا إعلان ولا حتى تنسيق مع الأعضاء ديالها بخصوص تنظيم أي مظاهرة، مضيفة أن كل ما كيروج فهاد الموضوع ما كيعبرش على موقفها الرسمي.

وفنفس السياق، كانت شارت المجموعة إلى أنه كاينين صفحات وحسابات غير رسمية كتنشر أخبار وبلاغات وصفتها بـ“الكاذبة”، وكتنسبها ليهم بلا أي علاقة بها، ودعات المتابعين إلى التأكد من صحة المعلومات قبل تداولها.

وكانت إدارة “جيل زد 212” دعات المتابعين ديالها باش ما ينساقوش ورا الإشاعات، مؤكدة أن أي بلاغ أو موقف رسمي كيصدر غير عبر القنوات الرسمية التابعة للمجموعة.

وفكازا، هادشي لي كان، المشهد كان مختلف على داك الشي اللي كانت كتروج ليه بعض الصفحات والمنصات الاجتماعية، وبقات ساحة السراغنة مستقرة بلا أي فتنة أو مشاكل تقدر تزعزع الأمن الداخلي ديال البلاد.