واش الرغبة في الهجرة أزمة أمنية أو اجتماعية، أنك تلقى الحل هو في منع الهجرة بالمقاربة الامنية كتعني غادي تحبس الشعب صحة في البلاد، وغادي يولي يحس براسو سجين عوض مواطن، ظاهرة الهجرة خاصها تعالج اجتماعيا واقتصاديا، خاص الدولة تحلى بالجرأة الكافية وتطرح سؤال علاش هادوك الشباب غير كيدخلو سبتة كيوليو ضاحكين وفرحانين بينما كانوا مبوئسين في بلادهم، وعلاش غير كيفوتوا الحدادة كيغوتوا بصوت واحد ڤيڤا إسپانيا فويرا مرويكو، راه الميكسيكيين كيحرگو لميريكان وكيبقاو يقولو فيفا ميخيكو، علاش هاد الشباب كابر حاقد على البلاد، وعلاش فاش كيخرج يحتج كيبدى يخرب ويهرس ويحرق، راه هادوا الأسئلة لي خاص تطرح وتنافش، ماشي واش غرروا بيهم صفحات من الجزائر او الموزمبيق، الموشكيل الحقيقي هو الرغبة لي كاينة معششة في الدماغ والحقد على البلاد.

راه دول عندها اقتصادات أكبر من المغرب وأفضل ومع ذلك مواطنيها كيهاجروا للبحث على فرص أفضل، الإسبانيين والبرتغاليين والبولنديين والميكسيك والبرازيل وعدة دول مواطنيها كيهاجروا للبحث على فرص افضل وهذا حق، ولكن كاين فرق كبير بين الهجرة والهرب، المهاجرين ديالنا كتحس بيهم هاربين من البلاد بحال الى كانوا فشي حفرة تحت الأرض، حقا إسبانيا وأوروبا كتمارس عليهم الإغراء، ولكن انه يولي عندك جيل فاقد الأمل في البلاد راه مسألة خطيرة، جيل كيحس براسو مشدود صحة في البلاد غير حاصل بسباب خطأ جغرافي لا يتحمل فيه أي مسؤولية، وكيدوز حياتو كلها باغي يصحح هاد الخطأ، وبعد المرات كيكلفوا الأمر حياتو، بحال الشباب لي ماتوا في اقتحام سبتة.

المغرب من ديما كاينة منو الهجرة، خيت جا قريب للجنة الأوروبية أكبر الاقتصادات واعظمهم، وحقا المغرب براسو قطع شوط كبير في التنمية، ولكن واش كافية وواش المواطن ميحس بالعدالة الاجتماعية وتمافئ الفرص، واش التعليم مثلا بحال في دول آسيا هو حقا بوابة للنجاح، دول بحال كوريا والصين وسينغافورة وماليزيا وعدة دول أخرى راه الى جبتي الباك ديالهم بنقطة مزيانة راه صافي حياتك تقتدات واخا يكونوا واليديك كيشموا السيليسيون، كذلك مناخ ريادة الاعمال والمقاولات والمشاريع الصغرى، هنا راه مقتولة الوقت اغلب المشاريع انفاق عمومي ومشاريع ديال البنية التحتية غير منتجة على المدى الطويل، هوما طبعا مزيانين وبيهم بدات ماليزيا ولكن راه فالتمانينات هادشي ماشي دابا، راه السوق واقف والحريات مسدودة وبنادم كيمشي الحبس على ستاتو او تيشورط، راه عادي يحس الشباب انه محبوس في البلاد وخاصو يهرب في اقرب فرصة.