"نخليو الخيمة تاع بوه".. تصريحات تبون قلقات التوانسة وزاد معنى حتى على الإمارات .

مصدر الصورة

كود – كازا //

قلقات التصريحات الأخيرة ديال الرئيس الجزائري عبد المجيد تبون التوانسة ،سوا السياسيين أو المجتمع المدني، بعدما هضر على الوضع الداخلي التونسي بعبارات هركاوية ما كتليقش بخطاب بين الدول.

تبون قال باللي الجزائر ما غاديش تسمح بأي تهديد لأمن تونس، وزاد قال بلهجة عامية: “لي يجيب الإرهاب باش يهدد تونس نخليو الخيمة تاع بوه”. هاد الكلام اعتابرو عدد من السياسيين التوانسة تدخل فالشؤون الداخلية ديال بلادهم، ومس بسيادة تونس واستقلالية قرارها.

وبعد هاد التصريحات، تفاعلات مواقع التواصل الاجتماعي ، وحتى عدد من الأحزاب والشخصيات السياسية لي خرجو ينتاقدو كلام تبون، وقالو ان تونس عندها مؤسسات أمنية وعسكرية قادرة تحمي البلاد، وما محتاجاش لأي وصاية من أي دولة.

من جهتهم، طالبو حقوقيون وسياسيون الرئيس التونسي قيس سعيد ووزارة الخارجية باستدعاء السفير الجزائري وتسليمو مذكرة احتجاج، حيث بالنسبة لهم هاد التصريحات خارجة على الأعراف الدبلوماسية.

الرئيس الجزائري عبد المجيد تبون هجم حتى على الامارات بلا ما يسميها مني قال عليها “دويلة” ، وقال باللي عندها تأثير سلبي كبير، وزاد: “فين ما كتحط رجليها كيسيل الدم” وقال: “كون بغينا، كنا قطعنا العلاقات مع هاد الدويلة من زمان، حيث ما كيجي منها غير الدم”.

متتبعين ردو على عبد المجيد تبون بلي إلى كان كيقصد الإمارات، فهاد الأسلوب ديال التلميح والاتهامات،كيزيد يبين
بلي النظام الجزائرى وصلات ليه العظم ،مني تزادت عليه العزلة الإقليمية،خصوصا أن الإمارات اللي وصفها بـ”الدويلة” قدرات فسنين قليلة تولي قوة اقتصادية عالمية، كتبني مدن ، وكتجلب أكبر الاستثمارات، حتى ولا عندها حضور دولي وازن كتبان قدامو الجزائر دولة قزمة.