الكورة علم ماعندو علاقة بنظرية المؤامرة.. ها علاش إسبانيا ربحت فرنسا اللي بانت بوعو كايخلع فماتش المغرب .

مصدر الصورة

گود سبور//

خرج بنادم كايهضر تاني بعد خسارة منتخب فرنسا مع إسبانيا فدومي فينال مونديال 2026 بنتيجة 2-0، وكايقول ان المنتخب الفرنسي بان بوعو غير قدام المنتخب المغربي فربع النهائي، وان الأخير هو اللي عطاه الفرصة فين يتفلعص عليه فماتش سالا بنتيجة 2-0 وبان فيه المنتخب المغربي بمستوى ضعيف، ورجعو يروجو تاني لنظرية المؤامرة والتخربيق الخاوي، فالوقت اللي خاص فيه التركيز على الخلل فين كاين.

اياه فرنسا بانت ضعيفة قدام المنتخب الاسباني، ولكن حيث اسبانيا قوية عليها، وغادي نرجعو تاني لخلاصة كلام الناخب الوطني محمد وهبي، واش المنتخب المغربي مع الاحترام الكامل لكل اللاعبين المغاربة، ولكن واش جودة امكانياتهم هي نفس جودة لاعبين اسبانيا وفرنسا ؟ طبعا لا ماش هي نفس الجودة وماش هو الريتم اللي كايلعبو فيه مع أنديتهم، وكيف قال وهبي خاص اللاعبين المغاربة يزيدو يخدمو ويطورو ريوسهم باش ينتقلو لاندية أوروبية كبيرة كاتلعب 3 الماتشات فالسيمانا بريتم طالع وكاتنافس على البطولات المحلية ودوري أبطال أوروبا.

راه اللاعبين ديال اسبانيا عندهم نفس الإمكانيات الفردية د لاعبين فرنسا وحنا فالمنتخب المغربي يالاه عندنا 3 او 4 اللاعبين بهاد القيمة، واللاعبين الاسباني والفرنسيين راهم مؤثرين فالأندية ديالهم، ولكن الصبليون زايدين على الفرنسيين بامتياز مهم، واللي هو أسلوب اللعب الموحد اللي عند اللعابا الاسبان، وهذا أسلوب اللعب الموحد راه شربوه وهضموه اللعابا من مراكز التكوين الإسبانية، واللي كاتخدم بأسلوب لعب موحد سنوات هادي، عكس مراكز التكوين الفرنسية اللي حتى هي الطوب وأكثر انتاجا د اللاعبين ولكن أساليب اللعب عندها مختلفة من مركز تكوين لاخر، ايوا راه أسلوب اللعب الاسباني القوي هو اللي خلى منتخب اسبانيا يبان واعر قدام فرنسا اللي بانت معهم ضعيفة.

ايوا باش نرجعو للمنتخب المغربي، واش حنا عندنا لاعبين عندهم نفس جودة الإمكانيات الفردية ديال اللاعبين الاسبان والفرنسيين؟ واش اللاعبين المغاربة عندهم نفس الريتم اللي كايلعبو به الاسبان والفرنسيين مع اندية كبيرة فأوروبا؟ طبعا لا، باستثناء شي ثلاثة او أربعة لاعبين بحال اشرف حكيمي ونصير مزواري وبراهيم دياز، وراه ما يمكنش تطلب من هاد الثلاثة ولا أربعة يهزو بوحدهم المنتخب، حيث اليوم الكورة راها كاتبنى على الكوليكتيف، يمكن لاعب ولا جوج فالمنتخب يكونو زايدين شويا فالنيفو ديالهم على البقية، ولكن البقية خاصهم يكونو قراب لهم فالإمكانيات الفردية وفأسلوب اللعب وفالريتم، باش يكون لگروب قوي وهذا الشي اللي عند المنتخب الاسباني وعند المنتخب الفرنسي، وحنا فالمنتخب المغربي مازال ما وصلنا له.

الواقع الحالي فالكورة المغربية هو ان الجامعة الملكية المغربية لكرة القدم برئاسة فوزي لقجع نجحو فسياسة التنقيب على المواهب المغربية فأوروبا، وقدرو ينافسو الاتحادات الوطنية فالبلدان الأوروبية والضغوطات ديالها على اللاعبين من أصول مغربية، والأكثر من هذا ربحو بزاف من المواهب وجابوها للمنتخب المغربي، وقدرو يخليو اللاعبين مزدوجي الجنسية يفضلو يلعبو للمغرب بلاد والديهم على البلدان فين تزادو وكبرو، وحتى الإدارة التقنية الوطنية والمدربين اللي دازو فتدريب المنتخب الوطني المغربي اجتهدو فخلق التجانس والانسجام بين اللاعبين، اللي جايين من مختلف مراكز التكوين الأوروبية بأساليب لعب مختلفة، وبنار منتخب وطني قوي وهاد الخدمة بدات من الولاية الرئاسة الاولى د فوزي لقجع فالجامعة مع بادو الزاكي، ووراه هيرفي رونار، وحاليلوزيتش، والركراكي، ودابا مع محمد وهبي.

السؤال الآن هو فين هي مراكز التكوين ديال الاندية المغربية من هذا الشي؟ وعلاش ما بقاتش كاتعطينا لاعبين فمستوى المنتخب الوطني المغربي؟ فما بالك تعطينا لاعبين عندهم ريتم طالع وأسلوب لعب موحد، راه بزاف من لاعبين البطولة ما كايعرفوش يوقفو حتى فالتيران ويطبق تعليمات المدرب، بقى غير يلعبو فالمنتخب وهذا دليل على ضعف التكوين، عاد باش نزيدو اهتمام رؤساء الاندية غير بالفريق الاول ويغرقوها انتدابات باش يربحو البطولة خوفا من الجمهور، اما ماركز التكوين راها آخر همهم، ايوا فين هي مراكز التكوين د الاندية بعدا بقى غير يكون فيها أسلوب اللعب موحد.

دابا الجامعة الملكية المغربية لكرة القدم برئاسة فوزي لقجع والادارة التقنية الوطنية، كانو عارفين بلي الكورة كاتطور وضروري الكورة المغربية خاصها تواكب هذا التطور، وعارفين ان الاندية والرؤساء ديالهم ما فيدهمش، داكشي علاش قبل عامين طلقت الجامعة مشروع التكوين فالأندية المغربية بشراكة مع OCP وبتنسيق مع الاتحاد الدولي لكرة القدم، وهذا الشي الهدف منو هو انتاج لاعبين فالمستقبل يكونو قادرين يمشيو للبطولات الاوروبية ويفرضو ريوسهم فيها، والغاية هي رفع مستوى المنتخب الوطني المغربي حيث تكوين اللاعبين من الصغر هو راس مال الكورة دابا.