واش كوكوس تالفة ولا تخلطو عليها الاختصاصات؟. برلمان البام غايصادق على البرنامج الانتخابي ومصادر لـ"كود": فيها خرق قانوني والاختصاص عند المكتب السياسي .

مصدر الصورة

احمد الطيب كود الرباط//

جدل سياسي وقانوني على الدورة 32 للمجلس الوطني للبام اللي غايكون نهار السبت 25 يوليوز 2026 فـ”قصر المؤتمرات الولجة” بسلا، بسباب برنامج الدورة خصوصا فسياق الهضرا للي كيروجو البام بخصوص التحاق جوكير الحكومة فوزي لقجع للحزب.

رئيسة المجلس الوطني، نجوى كوكوس، صيفطات دعوات رسمية للأعضاء وفيها جدول أعمال من أربعة د النقط، ولكن النقطة الثالثة هي اللي عليها الجدل كاتبين فيها: “عرض البرنامج الانتخابي ومناقشته”.

مصادر من داخل الحزب قالوا لـ”كود” بلي هاد النقطة أصلاً ما كايناش ضمن اختصاصات المجلس الوطني! وحسب العرف والقوانين ديال البام، البرنامج الانتخابي كيصادق عليه المكتب السياسي ماشي المجلس الوطني، وهاد التداخل خلى بزاف يتساءلوا واش الحزب عايش “تيه تنظيمي” وقوانينه ولات كتفصل على المقاس.

“كود” هضرات مع نجوى كوكوس، رئيسة المجلس الوطني، وسولاتها على هاد النقطة، وجاوبت بلي إدراج نقطة البرنامج الانتخابي جاي من الفقرة 2 و3 من المادة 32 ديال النظام الداخلي للحزب.

وحسب الوثيقة اللي اطلعات عليها “كود”، المادة 32 كتقول بلي المجلس الوطني هو برلمان الحزب وأعلى هيئة تقريرية، ومن مهامو فالفقرة 2: تحديد سياسة واستراتيجية الحزب فيما بين مؤتمريه، وفالفقرة 3: وضع المبادئ الأساسية للاستراتيجية الانتخابية للحزب.

يعني، كوكوس كتشوف بلي مناقشة الاستراتيجية الانتخابية كتدخل فقلب هاد الفقرتين، وخا المصادر ديال كود كيشوفوا بلي “البرنامج الانتخابي” حاجة، و”المبادئ الأساسية للاستراتيجية” حاجة أخرى، والمكتب السياسي هو لي عندو الكلمة الأخيرة.

الخبار اللي كتروج بقوة فكواليس الحزب، هي أن هاد الدورة غادي تشهد التحاق فوزي لقجع بحزب الجرار، هاد المعطى يلا صح، غادي يقلب الطابلة على بزاف ديال التوازنات داخل القيادة الجماعية للحزب وغادي يبدل الخريطة كاملة. داخل الحزب وحتى داخل المشهد السياسي كامل.