8.2 ملايين بلاصة و86 وجهة عالمية.. "لارام" طلقات أكبر برنامج جوي استثنائي فصيف 2026 .

مصدر الصورة

عمر المزين – كود///

علنات الخطوط الملكية المغربية على برنامج جوي استثنائي لصيف 2026، غادي توفر فيه حوالي 8.2 ملايين بلاصة، بزيادة كتبلغ 23 فالمية مقارنة مع صيف 2025.

البرنامج الجديد، وفق بلاغ صادر عن “لارام”، غادي يربط المغرب بـ86 وجهة دولية فإفريقيا وأوروبا والأمريكيتين وآسيا والشرق الأوسط، باستعمال أسطول فيه 67 طيارة.

وبحسب الشركة، غادي تكون رحلات نحو 44 وجهة فأوروبا، مع تعزيز الحضور فالدول اللي فيها جاليات مغربية كبيرة، و29 وجهة فإفريقيا انطلاقاً من الدار البيضاء، و7 وجهات فالأمريكيتين، وهي الولايات المتحدة الأمريكية وكندا والبرازيل، إضافة إلى 6 وجهات فآسيا والشرق الأوسط.

وعلى مستوى العرض، حسب الشركة، غادي توفر الشركة أكثر من 3 ملايين بلاصة نحو أوروبا، بزيادة 22 فالمية، وأكثر من 1.8 مليون بلاصة نحو إفريقيا، بزيادة 36 فالمية. أما آسيا والشرق الأوسط، فالعرض غادي يفوت 524 ألف بلاصة، بزيادة 16 فالمية، بفضل تعزيز الرحلات نحو الصين وقطر والمملكة العربية السعودية والإمارات العربية المتحدة.

وفالأمريكيتين، غادي يرتفع العرض بـ7 فالمية ويوصل لـ723 ألف بلاصة، بينما غادي توفر شبكة الرحلات المباشرة “بلا توقف” أكثر من 890 ألف بلاصة، بزيادة 37 فالمية، من بعد افتتاح القاعدة الجوية فتطوان. وحتى الشبكة الداخلية غادي توفر قرابة 1.2 مليون بلاصة، بزيادة 18 فالمية.

وأكدت الشركة أنها غادي تحافظ على الجدولة الزمنية اللي بدات فصيف 2025، واللي كتعتمد على رحلات ليلية نحو أوروبا ورحلات نهارية نحو إفريقيا عبر محور الدار البيضاء، باش يتحسن الربط بين الرحلات وتتطور تجربة المسافرين.

وكيرتكز البرنامج الصيفي على أسطول كيضم حالياً 67 طيارة، مع انتظار دخول طيارات جديدة خلال صيف 2026، وهو ما غادي يمكن الخطوط الملكية المغربية من تشغيل البرنامج كامل بلا ما تلجأ لكراء طيارات من شركات أخرى.