نهار 4 يوليو 2026 كان هو النهار لي احتفلات به مريكان بالذكرى 250 لاستقلالها، وهو نفس النهار اللي لعب فيه المنتخب المغربي مع كندا فمريكان وربح بـ3/0، هاد المصدافة فكراتنا فقصة فتاريخية كتجمع بين المغرب وواشنطن.

فـ1777، خدا السلطان سيدي محمد بن عبد الله قرار تاريخي خلا المغرب أول دولة فالعالم تعترف فعلياً بالولايات المتحدة الأمريكية، ملي خلا السفن اللي هازة الراية المريكانية تدخل للموانئ المغربية، من بعد استقلال أمريكا على بريطانيا.

هاد القرار جا فإطار رؤية استراتيجية ديال السلطان، اللي كان باغي يوسع التجارة ديال المغرب ويقوي الحضور الدبلوماسي، ويفتح علاقات مع الدولة الأمريكية الجديدة، بلا ما يبقى مرتبط غير بالقوى الأوروبية.

فداك الوقت، كانت أمريكا كتقلب على اعتراف دولي باش تبين وجودها، أما فرنسا ما اعترفاتش بها حتى لعام 1778، وبريطانيا ما اعترفاتش باستقلالها رسمياً حتى لـ1783.

وبعد تسع سنين، وبالضبط فـ1786، وقع المغرب ومريكان معاهدة الصداقة والسلام، اللي معروفة باسم “معاهدة مراكش”، بين السلطان سيدي محمد بن عبد الله والمبعوث الأمريكي توماس باركلي. وهاد المعاهدة مازالا خدامة حتى اليوم، وكتعتبر أقدم معاهدة دبلوماسية مستمرة فالسياسة الخارجية الأمريكية.

المغرب فداك الوقت كان غندو طموح كبير يوسع تجارتو فالمحيط الأطلسي، وكانت موانئ بحال الصويرة والعرايش والرباط وسلا كتلعب دور مهم فالتبادل التجاري، كيف ما ساف السلطان ط فاستقلال أمريكا فرصة باش يبني شراكة جديدة تخدم مصالح المغرب، بلا صداع ديال اوروبا.

ومن داك الوقت طورات العلاقات حتى توقعات معاهدة 1786، اللي ضمنات حرية التجارة، وحماية السفن والرعايا الأمريكيين، حيث المغرب كان باغي يحمي تجارتو البحرية، ويلقى شريك جديد يصدر ليه منتجات بحال الجلد والشمع، ويستورد منو اخر مكاين، وفنفس الوقت يخلق توازن مع النفوذ الأوروبي.

وفـ1821، تفتحات أول مفوضية دبلوماسية أمريكية فمدينة طنجة، وهو حدث تاريخي كيبين الثقة اللي كانت بين الجوج دول.

واليوم، دامت هاد العلاقة الدبلوماسية 250 عام، وتطورات باتفاقيات وشراكات استراتيجية، من بينها اتفاقية التبادل الحر، وتصنيف المغرب حليف رئيسي لمريكان برا حلف “الناتو”، وتنظيم مناورات “الأسد الإفريقي” بشكل سنوي واعترف واشنطن بمغربية الصحراء.