نشطو أحوزار والشيخات.. التقدم والاشتراكية دار لقاء تواصلي مع ساكنة شياظمة فجو احتفالي جمع ما بين القواعد والقعدة .

منذ

كود – الشياظمة//

عرفات جماعة سيدي امحمد أومرزوق بإقليم الصويرة لقاء تواصلي نظمو حزب التقدم والاشتراكية بمناسبة انعقاد المؤتمر الإقليمي الرابع للحزب بحضور الأمين العام نبيل بن عبد الله، مع حضور مهم ديال الساكنة، فجو جمع بين النقاش السياسي والأجواء الفنية اللي كتعكس انفتاح الحزب على التراث الشعبي .

اللقاء كان فرصة باش الحزب يقرب كثر من المواطنين، ويسمع لانشغالاتهم ويشاركهم التصورات ديالو بخصوص عدد من القضايا اللي كتهم الحياة اليومية، فإطار التواصل المباشر مع الساكنة.

ومن جهة أخرى، الفقرة الفنية اللي حياها الفنان أحوزار مع الشيخات عطات نكهة خاصة للنشاط، وخلقات أجواء احتفالية لقات تفاعل كبير من عند الحاضرين، وبيّنات أن الفن الشعبي مازال عندو بلاصة كبيرة عند المغاربة، حيث قدر يجمع قواعد الحزب والمتعاطفين فجو من الفرح والتواصل.

هاد النوع ديال الأنشطة كيبين باللي السياسة والشيخات ماشي بالضرورة متناقضين، ولكن يقدرو يكملو بعضياتهم، بحيث كيكون اللقاء فرصة للنقاش، وفنفس الوقت مناسبة للاحتفاء بالتراث المغربي.

وفالأخير، التواصل المباشر مع المواطنين، والاستماع ليهم، وتنظيم لقاءات مفتوحة كيبقى من أهم الوسائل اللي كتقرب الأحزاب من الناس، وكتخلي النقاش السياسي حاضر وسط المجتمع، خصوصا إلا كان الحفاظ على الهوية الثقافية والفنية ديال البلاد، داكشي علاش هاد المبادرة عحبات بزاف ديال المتتبعين لشأن الفني والسياسي لي طالبو بتعميمها فجميع مؤتمرات الحزب.