بسباب موجة الحرارة المرتفعة لي كتعرفها عدد مناطق المملكة حذرات وزارة الصحة والحماية الاجتماعية المواطنين من خطورة ارتفاع درجات الحرارة، ودعاتهم باش اتخاذو جميع الاحتياطات الضرورية لتفادي المضاعفات الصحية، خصوصاً عند الفئات الهشة.

وحسب بلاغ لوزارة الصحة، شارت إلى أن الدراري الصغار، وكبار السن، والعيالات الحوامل، والأشخاص المصابين بأمراض مزمنة، إضافة إلى الأشخاص اللي كيمارسو أنشطة بدنية أو كيخدمو تحت أشعة الشمس، كيبقاو الأكثر عرضة لمخاطر موجات الحر.

وأكدت الوزارة فنفس المصدر، على ضرورة شرب لما بانتظام وبكميات كافية، حتى قبل الإحساس بالعطش، وتفادي الخروج خلال فترات الذروة، خاصة ما بين 12 ديال النهار و4 ديال العشية، مع البقاء فالأماكن الباردة أو المهوّاة، وارتداء ملابس خفيفة، وتجنب المجهود البدني غير الضروري.

ودعت الوزارة، الأسر باش تراقب الناس الكبار فالسن والمرضى داخل البيوت، ومساعدتهم على شرب الماء، والالتزام بالتوجيهات الوقائية، مع الانتباه لأي أعراض قد تدل على تأثر صحي بسبب الحرارة.

وفهاد السياق، و فتصريح خاص لـ”كود”، كان سبق وأكّد الدكتور حمضي الباحث في السياسات والنظم الصحية، أن موجات الحر ما خاصهاش تتاخد باستخفاف، حيث ممكن تسبب مضاعفات خطيرة وتقدر توصل حتى للموت، بسبب الجفاف الحاد أو السالمة أو بجوج.

وكان وضح حمضي، أن أول وأهم خطوة هي شرب لما والسوائل بشكل منتظم قبل الإحساس بالعطش، حيت الجسم فهاد المرحلة كيكون بدا كيتعرض لفقدان السوائل.

وزاد الباحث فقطاع الصحة، أن لما بوحدو ما كافيش، ولكن خاص حتى العصائر الطبيعية، ديسير والخضر لتعويض الأملاح المعدنية، مع تجنب الإفراط في القهوة، أتاي والمشروبات السكرية.

وأكد المتحدث أن تبريد الجسم ضروري، بدوش بارد بزاف مرات في اليوم، أو تبليل الجسم والوجه والأطراف، وزاد أن التهوية مهمة فالدار، وان الشراجم خاصهم اتحلو بنهار وبداية الصباح، ويتسدو بلليل للحفاظ على برودة ديور.