ساكنة جماعة الطاوس كترفض التحديد الإداري لرمال مرزوگة وكطالب بإنصاف ذوي الحقوق      .

كود – مرزوكة//

نظمات الساكنة ديال مرزوكة،” قبيلة آيت خباش“، اليوم الأربعاء فاتح يوليوز 2026، وقفة احتجاجية باش يعبرّو على الرفض ديالهم لعملية تحديد وتحفيظ الملك اللي سميتو “رمال مرزوكة”، من بعد ما علن المحافظ العام على الأملاك العقارية بداية إجراءات التحديد.

وحسب معطيات محلية، فطلب التحفيظ كيحمل الرقم 14.75961، وسبق تنشر ملخص الإعلان ديالو فالجريدة الرسمية عدد 1223 الصادرة نهار 8 يونيو 2023.

مصدر الصورة

وكيقولو المحتجين بلي هاد الرمال هي أرض سلالية رعوية، وديما كانت كتعتبر ملك تقليدي ديال قبيلة آيت خباش من سنين طويلة، وكيشوفو أن أي محاولة باش يتحفظ هاد الملك ولا يتحدد باسم شي جهة أخرى، هي اعتداء على الحقوق ديالهم فالأرض، وحتى على الهوية والانتماء القبلي والتاريخي ديالهم.

ومع وصول الأعوان التقنيين باش يبداو عمليات التحديد، خرجو العشرات ديال الرجال والعيالات من المنطقة واحتجو بطريقة سلمية، وعبروعلى الغضب والرفض ديالهم لهاد المسطرة، وسط تخوف كبير على المصير ديال الأرض اللي كيعتابروها ديالهم.

مصدر الصورة

وفتصريح لواحد من أبناء المنطقة لگود، قال حميد آيت علي ”أفرزيز“ بلي ساكنة جماعة الطاوس، التابعة لدائرة الريصاني بإقليم الرشيدية، كتشوف باللي المنطقة كتعيش التهميش وضعف التنمية وخا الشهرة السياحية ديالها، خصوصاً مرزوكة .

وضاف أن الساكنة، وعلى رأسها قبيلة آيت خباش، ساهمات فالتعريف بالمنطقة عالمياً، ولكن كتواجه مشاكل مرتبطة بالتحديد الإداري والعقاري، اللي تسبب، حسب قولو، فعدد من النزاعات والشكايات، وأكد أن السكان سبق ليهم احترمو قرارات نقل المخيمات السياحية حفاظاً على البيئة، وأنهم ماشي ضدّش القانون، وإنما كيطالبو، حسب تعبيرو، بمساطر قانونية كتضمن حقوق ذوي الحقوق، وتحترم الإرث الثقافي والهوية المحلية، وتسمح ليهم باستغلال أراضيهم وإنجاز مشاريع تنموية.