كود فزيارة للكوارا ديال الدجاج..العرض كتر من الطلب والرخا كيهدد القطاع والفلالس صحاح كيقوقعو .

مصدر الصورة

كود – عثمان الشرقي //

فزيارة ميدانية دارها موقع “كود” لعدد من لكوارا ديال تربية الدجاج فيها ثادلا، أكدو مهنيين للموقع بلي قطاع دجاج كيعاني من أزمة صعيبة بسبب فائض الإنتاج وتراجع الطلب، خصوصاً من مورا العيد الكبير ، وهاد الشي تسبب فخسائر كبيرة للمربين ونقص كبير فالسومة.

https://www.facebook.com/share/v/1FvzxUvV44/

وحسب ما صرحو به مهنيين لـ”كود”، تراجع الطلب من بعد العيد حاجة عادية كل عام، ولكن الوضع هاد العام كان صعيب كيف عوام كورونا ، حيث بقات كميات كبيرة من الدجاج واحلة فالكوارا ، وهاد الشي خلا عدد من المربين يضطرو يبيعو بأثمنة كتقل من تكلفة الإنتاج.

وأكدو المهنيين لكود بلي الدجاج اللي كاين فالسوق صحيح ما فيه حتى مشكل صحي، حيث كيدوز من مراقبة بيطرية دايمة من طرف المصالح المختصة التابعة لوزارة الفلاحة و”أونسا”.
كيف زادو وضحو بلي الدجاج كيتعرض لتحاليل دورية، والأدوية واللقاحات المستعملة مرخصة قانونياً.

وقال أحمد لكود، واحد من مربي الدجاج، بلي تكلفة إنتاج الكيلوغرام الواحد كتقرب 12 درهم، فحين كيخرج السوق ب 9 دراهم ، وهاد الشي كيخلي المربين يخدمو بالخسارة.

أما اسماعيل مربي الدجاج قال لنا بلي روطار تسويق الدجاج كيزيد من الخسران بسبب ارتفاع مصاريف العلف والرعاية الصحية.

كيف ما قالو لنا حرايفية بالقطاع بلي تربية الدجاج كتحتاج متابعة يومية ومستمرة 24/24، وأن كل كوري فيه 10 آلاف دجاجة كيستهلك 40 طن من العلف، أما تمن الطن الواحد واصل 5000 درهم، زائد مصاريف التدفئة والكهرباء والڢاكسانات والأدوية والكرا والترونسبور.

كما وضحو لنا بلي بعض المربين ما كيحترموش فترة الراحة الصحية بين دورات التربية، واللي خاصها توصل لـ21 يوم باش يتم تنظيف وتعقيم الكوارا، وهاد الشي كيساهم فارتفاع الإنتاج بشكل كبير.

ومن جهة أخرى، قالت الجمعية الوطنية لمربي دجاج التسمين بلي المستهلك المغربي كيشري الدجاج بأثمنة بين 12 و15 درهم للكيلوغرام حسب المناطق، ولكن المربين هما اللي كيتحملو الجزء الأكبر من الخسائر.

كيف ما وضحات الجمعية بلي السوق الوطنية ما كتحتاجش كثر من 9 ملايين كتكوت فالسيمانة، أما الإنتاج الحالي كيفوت 15 مليون كتكوت أسبوعياً، وهاد الشي تسبب ففائض كبير غرق السوق وخلا الأثمنة طيح، أما السوق الوطنية فخاصها غير 7 المليون كتكوت فالسيمانة.

وخا أن ثمن الدجاج كينعكس بشكل إيجابي على القدرة الشرائية ديال المستهلكين، ولكن المهنيين كيحذرو من أن البيع بأقل من تكلفة الإنتاج يقدر يهدد استقرار القطاع ويخلي عدد من المربين ينشو الدبان، وهاد الشي ممكن تكون عندو انعكاسات على الإنتاج والاثمنة مستقبلا.