تذاكر المونديال و"البام": بدا الركوب السياسي على انجازات المنتخب ومدراء فوزارات البام واعضاء دواوين بنسعيد خداو تيكيات للي مقدروش ملايرية مغاربة يحصلو عليهم..شكون عطاها ليهم كيفاش المكتب السياسي باغي يدير الحملة بإنجازات لقجع .

مصدر الصورة

احمد الطيب كود الرباط//

ناض نقاش عاوتاني ف الكواليس السياسية والرياضية بالمغرب، حول “التذاكر د المونديال” وريحة “الاستغلال السياسي” لإنجازات لعابة د المنتخب الوطني، بحيث معطيات توصلت بها “گود” تفيد بلي بزاف د الأعضاء والوجوه ديال حزب الأصالة والمعاصرة (البام) حصلوا على تذاكر ديال ماتشات أسود الأطلس ف المونديال بطرق غامضة وغير مفهومة، ف الوقت لي عدد من المغاربة منهم ملايرية مقدروش يحصلو على تيكي.

حسب مصادر “گود” تذاكر المونديال ولات “إكراميات” حزبية كيتوزعوا تحت الطابلة باش يضمنوا ولاء لوزراء معينين مع قرب المعركة الانتخابية.

واش “البام” ولا كيتحكم ف كواليس الجامعة الملكية المغربية لكرة القدم؟ ولا القضية غير أعضاء جامعيين عندهم علاقة مباشرة بالبام وكيستغلوا المناصب ديالهم ف الرياضة باش يخدموا مصالحهم الانتخابية؟ تداخل كورة والسياسة بهاد الطريقة البشعة كيقيس ف الصميم مبدأ تكافؤ الفرص.

البلان باين، وهاد الشي كيأكدو البلاغ الأخير ديال المكتب السياسي للحزب لي خرج اليوم، حيث دارو فقرة خاصة باش يمدحو إنجازات المنتخب والإشعاع الدولي ديالو.

هاد “الركوب السياسي” دايرو الحزب باش يستغل الشغف الكبير ديال المغاربة للمنتخب.

توزيع التذاكر بطرق ملتوية على مؤثرين واعضاء ف دواوين، واللي اصلا يستحيل عضو ف ديوان يمشي للمونديال نظرا للصالير والامكانيات المالية ديال مستشار فالديوان، الا اذا كانو عندهم شركات ودايرين صفقات وضاربين فيها الملايير.

المنتخب الوطني ملك لجميع المغاربة وفخر للجميع، وتوظيف الكورة ف صناديق الاقتراع بهاد الطريقة كيزيد غير يفقد المواطن الثقة ف العمل السياسي والمؤسساتي.