كود عاينات موسم الحصاد فسهل تادلا ...الصابة موجودة والعام زين وخا الماكينات قلال.. وها بشحال كيطلع كل هكتار فالحصاد .

مصدر الصورة

كود – عثمان الشرقي //

بدا الحصاد فسهل فتادلا، بعدما الغلة وجدات والصابة طابت وخا الماكينات ديال الحصاد قلال ولكن مزال الوقت لي بغا يحصد ،گود واكبات بعض مواقع الحصاد فالمنطقة المعروفة بزراعة القمح والشعير والجلبانة لي كيراهنو عليهم الفلاحة باش يواجهو تقلبات السوق والجو .

https://www.facebook.com/share/v/1Rocx7QDnK/

فلقاء مع واحد من الفلاحة بالمنطقة كيقول ”الغازي“ لگود بلي الماكينات ديال الحصاد ضرورين حيث كيربحو الوقت ويسهلو الخدمة وكيحافظو على الغلة مقارنة مع الحصاد بالمنجل لي كان شحال هادي .

فلاح اخر اسمو “ؤمزيان“ قال لنا بلي «هاد العام حسن من العوام لي فات حيث كاينة الغلة وكاينة الجودة ، وخا الشتا لي صبات متابعة مخلاتش الناس يحرثو والسنين ديال الجفاف المتابعة من كوفيد خلات ناس تقطع لياس وما تحرتش.

”العربي“ گايد ديال ماكينة الحصاد قال لكود «بلي الماكينات قلال حيث ناس محرتاتش هاد العام ،ومابين الفدان والفدان المحروث كاينين عشرة لي ممحروتينش الشي لي كيخلي السومة كطلع حتى لألف درهم للكتار ،زيد عليها ان الخدامة قلال ودواور ولاو خاويين ،ومابقيناش كنلقاو لي يخدم معانا، اما بخصوص العافية لي كتشعل فكيقول انها جاية من عوامل ميكانيكية بدرجةاولى عاد عوامل خارجية بحال الزاج والگارو،كيفما طالب انه تكون البومبية رهن الاشارة فوقيتة الحصاد ودير بحساب هاد الحوادث .

الشتا اللي صبات هاد العام مزيان خلات الفلاحة يتفايلو بلعوام الجاية، مني قال فلاح اخر لكود : «من سنوات طويلة ماشفناش زرع بهاد الجودة و هادشي خلا بزاف ديال الفلاحة عوالين باش يحرثو العام الجاي ،كيف ما قال ان هاد الصابة مزيانة حتى البهايم لي غيلقاو مياكلو العام الجاي .

وبخصوص المردودية، قال: «الشعير عطانا نتائج مزيانة بزاف هاد العام، وهادشي ما شفناهش من مدة طويلة بسبب سنوات الجفاف اللي دازت».وخا الفلاحة كيتشكاو من الغلا و المصاريف لي كتبدا من الزريعة والدوا والترونسبور لي كيطلبو مصاريف كتيرة .

سهل تادلا ليكيتعتبر سلة غدائية مهمة للمغرب،عرف هاد العام فموسم الحصاد حركية مقارنة مع العوام لي فات وخا ان بزاف ديال الفلاحة محرثوش بسباب الجفاف لي كان فسنوات لي فات بالإضافة الشتا لي صبات متابعة ومخلاتش الناس يحرثو ، وهادشي لي اثر حتى على الهجرة القروية حيث هاجروا الشباب ومبقاوش الخدامة لي كيخدمو فالحصاد، عاد الماكينات لي داخلة قليلة ولي مزال اغلبها كاين فالشاوية ،ولكن العموم حسب تقييم فالفلاحة كيبقى الحصاد ديال هاد العام حسن بزاف من السنين لي فاتو.