سكان من المدينة القديمة فكازا كيحتجو قدام ولاية الجهة: هدمو لينا ديورنا بلا استفادة بغينا حقنا وكنعرفو المسؤولين ماشي سيستيم .

أميمة عطية كود كازا ///

عدد من سكان أحياء “درب موحى وسعيد”، “درب رماد”، و”درب الدالية” بالمدينة القديمة فكازا، دارو ، اليوم الثلاثاء، وقفة احتجاجية قدام مقر ولاية جهة الدار البيضاء – سطات، باش يطالبو بحقوقهم بعد تهدمو ديورهم بلا استفادة، ووصفو المحتجين عدم الاستفادة من برطمات بـ”الحكرة” و”البلوكاج” الإداري لي كيوجهوه من طرف لمعنيين بالأمر بلا أجوبة مقنعة .

وفهاد السياق، كالت الساكنة، في تصريحات لـ”كود”، إن ملفات الاستفادة الخاصة بهم متسجلاتش ف(“السيستم”)، واخا عندهم أوراق الملكية الرسمية لي كتبث حقوقهم القانونية، وزادو أكدو على أنه كاين لي استافد وبلي هادشي فيه أهلوية وهوما مكيعرفوش السيستيم ولكن كيعرفو المسؤولين.

مصدر الصورة

وزادت عبرات ساكنة في تصريحاتها لكود على الغضب ديالها، بعدما وجهوا شكايات متعددة لمصالح عمالة آنفا والمقاطعات، ولكن بلا أي رد أو متابعة، وكالو بلي بعض المسؤولين المحليين امتنعوا عن استقبالهم أو النظر في مطالبهم.

ووضحات الساكنة، في نفس الإطار أن عمليات الهدم لي كانت قبل شهرين تسببت في تدمير ديورهم وتشريدهم، حيت خرجو كراو وهوما حالتهم المادية ضعيفة وكاين لي كالس غير عند عائلتو .

مصدر الصورة

وفي تصريح آخر، عبرات وحدة من سكان هاد المنطقة لـ”كود” وكالت: “حنا ماشي ضد تطور البلاد، وباغين التقدم ونقل الحضارة للمدينة، ولكن ماشي على حسابنا وعلى حساب تشريدنا وتدمير ولادنا. ما يمكنش التقدم يكون بالحكرة والإقصاء وبلا ما نستافدو”.

وختمو، ولاد وبنات المدينة القديمة مطالبهم بالتدخل العاجل والفوري للجهات المسؤولة لإعادة مراجعة اللوائح الرقمية وإنصاف المتضررين وحمايتهم من خطر التشرد لي كيهددهم منذ أكثر من شهرين.