واش وزارة الداخلية باغا ترد المغرب بحال كوريا الشمالية، كيفاش قايدة خارجة عند كساب تقوليه خاصك تبيع خروفك بخمسين ألف آش دخلها يبيعو حتى بمليون، شكون عطاها الحق، على هاد الحساب القايدة تدوز عند داسيا تقوليهم بيعو الداستر غير بخمسة دالمليون، تدوز لبومبة دالمازوط تقوليهم كيفاش المازوط بسطاش لدرهم بزاف خاصو يتباع غير بخمسة دراهم .

محمد سقراط-كود///

واش وزارة الداخلية باغا ترد المغرب بحال كوريا الشمالية، كيفاش قايدة خارجة عند كساب تقوليه خاصك تبيع خروفك بخمسين ألف آش دخلها يبيعو حتى بمليون، شكون عطاها الحق، على هاد الحساب القايدة تدوز عند داسيا تقوليهم بيعو الداستر غير بخمسة دالمليون، تدوز لبومبة دالمازوط تقوليهم كيفاش المازوط بسطاش لدرهم بزاف خاصو يتباع غير بخمسة دراهم، وتدوز عند سونطرال تقوليهم كيفاش كتبيعو الحليب بتلاتة دراهم بزاف خاص تبيعوه غير بدرهم.. من فوقاش القياد ولاو عندهم هاد الصلاحية لي القايد العيادي والقايد البزاري ومكانتش عندهم.

مصدر الصورة

كل مرة كيوقع شي موشكيل كيكون الحل هو وزارة الداخلية كتخرج القياد يتبوردو على المغاربة.. شفناها في كورونا، وشفناها في حملات تحرير الملك العمومي، ودابا كنشوفوها في سوق الكسيبة.. بغيت غنعرف علاش عتامدات سعادة القايدة باش عيرات داك الحولي، وقالت بلي يستاحق خمسين ألف ماشي سبعين.. واش ولاو القياد كيقراو هادشي في أكاديمية قنيطرة.. راه وارن بافيت ومايقدرش يعير كبش في السوق ويعطيه الثمن لي يستاهل باش يتباع، قيمة داك الحولي السوق لي غادي يحددها، مولاه طالب فيه سبعين الف الى كاين لي يعطيهاليه آشمن دخل عند القايدة او القايد او وزارة الداخلية كلها، راه بهاد المنطق الكسابة يخليو كسيبتهم عندهم وگاع مايدخلو للسوق وداك الساعة القايدة تشوف باش تعمرو.

واش هادشي لي دايرة هاد القايدة واش غير من راسها او وزارة الداخلية دايرة شي بزنامح بحال البرنامج خماسي ديال ستالين، أو شي ثورة زراعية بحال ديال ماو تسي تونغ، واش القايدة استلهمات هادشي من ديوان الحسبة لي كانوا كيدورو في الأسواق في دير الزور ويظبطو الاثمنة، ملي باغا القايدة تحارب الشناق وتحدد الثمن كانت تخرج عند الفلاحة تجمع الحولي وتجي تبيعو في السوق بالثمن بي بغات والى بغات تبيعو بخمسين او ربعين تخلص الفرق من جيبها، هادشي لي كان كيوقع في البلدان الشيوعية التوليتارية المگملة، الدولة لي كتنتج وتبيع باش بغات والفلاح والكساب غير خدامين عندها، طبعا هادشي تسالى بمجاعات قتلات الملايين وبدول مخربة، واش المواطن معندوش عقل يفكر بيه والى جاتو الحاجة غالية مايشريهاش، عوض تتدخل القايدة وترخصها ليه، بحال هاد القياد كيهليو الدولة تبان غبية وشادة في القشور، شعب كامل ناض يشري نفس الحاجة في نفس النهار عادي غادي تغلى، ولي عطى الله والسوق هو هذا، بغيتيه يرخاص ماتشريهش راه مابزز عليك حتى واحد نتا انسان وعندك مخ فكر بيه، بغيتي تبزز على راسك تشريه تحمل المسؤولية، لاش غادي تجي قايدة ابغي تحدد ثمن السوق، سطالين ومادارهاش.