فضيحة فحزب التراكتور. لملايري مول لفروماج بن الضو اللي كذب على لمغاربة وقال استاقل عطاوه التنسيق وطالق اشاعة باللي كينسق مع شخصية كبيرة. هاد البامي محيدين ليه الباسبور ومسدودة عليه الحدود وقضيتو مازال ما بداتش .

منذ

كود سعيد لمزابي كازا ///

لملايري المتابع فقضية ما عرفناش علاش ناعسة، الامين العام الجهوي السابق لحزب الاصالة والمعاصرة مول لفروماج عبد الرحيم بن الضو، كدير خدمتو فالحزب كيف قبل. حسب مصادر “كود” من باميين فالجهة فهاد السيد هو المخاطب الوحيد ديالهم.

حسب مصادر “كود” فمول لفروماج للي كذب هو وحزبو على لمغاربة باش قال باللي جمد عضويتو داخل البام بصفة مؤقتة، كيتاصل بالمرشحين والمرشحات فالجديدة وسطات والمحمدية ومديونة والنواصر وكازا وكيهدر معاهم.

اخطر من هاد الشي، فهاد الشخص اللي مسحوب منو الباسبور ديالو ومسدودة عليه الحدود بسباب قضايا كتهم تجارتو، قال لينا باللي دابا ما كيهدرش مع قادة البام بل مع شخصية كبيرة، حسب اداعاءاتو.

هاد لملايري كذب على لمغاربة باش قال باللي تجميد عضويتو جات “حرصاً على صون صورة العمل البرلماني والحزبي، وتفادياً لأي لبس أو تأويل قد يسيء إلى الحزب أو يمس بالثقة في المؤسسات، مشدداً على أن الخطوة تعكس ما اعتبره روح المسؤولية السياسية والأخلاقية التي يؤمن بها”.

هشام الصابري كاتب الدولة لدى وزير الشغل المكلف بالشغل كان تعطاه مهمة منسق جهوي لكازا ولكن ما زططتش ورجع هاد لملايري اللي بدا حياتو بتهريب لفروماج من الشمال، لمهام قال للمغاربة باللي ما بقاش مكلف بيها.

وكان قاضي التحقيق باستثنافية كازا قرر ف4 فبراير 2026 يسد عليه الحدود ويسحب ليه الباسبور بسباب فضايحو وكاين مسير فشركتو حتى هو خاصع للمراقبة القضائية.