شجاعة مزور غير فالتصريحات: المسؤول على السوق الداخلية والتجارة كيتفطح ففلندا والداخلية والبوليس والكسابة واكلين الدق فالرحبة .

مصدر الصورة

احمد الطيب -كود الرباط//

السوق الوطنية لبارح شعلات، شفتنا فتنة العيد الكبير، وكيفاش مواطنين بسطاء كيتقاتلو على الحولي ف الرحية فعدد من الاسواق وكانو مواجهات بالحجر والدفيع والخطيف على الهوندات باش ياخدو الحوالا د العيد، بسبب ازمة الوفرة فالسوق. كون مكانتش الداخلية وتدخل السلطات الامنية ف عدد من الاسواق كانت غاطيح ارواح.

قدام هادشي كامل، وتبعنا ف “كود” عدد من الاسواق من العيون لكازا لسلا لسطات لنواحي بني ملال، وثقنا الاحداث بالصوت والصورة. كانت تحركات من السلطات من الوالي ومن مسؤولي وزارة الفلاحة، باش يعمرو الاسواق بالكسيبة. تحدي كبير فوقت وجيز، نجحو فبلايص كثيرة وفشلو ف بعض البلايص. وكيبقا الغائب الأكبر من عملية تتبع اسواق بيع الاضاحي هو وزارة التجارة والصناعة، للي وزيرو الاستقلال ف دار غفلون ومحاضرش فهاد العالم.

مزور اختار الحلول السهلة، الاختباء قدام الازمان، قبل ايام حصلتو “گود” فالبرلمان وسولتو على الاثمنة ديال الحوالا، تهرب كيف عادتو، هاد الوزير كانت عندو الشجاعة فقط باش يقول كاينين فراقشية فالسوق ف ميدي 1 تيفي، وعطا كادو للبي جي دي يضربو ف حكومة مشارك فيها. اليوم بلع لسانو، فوقت الازمة هرب، كيف عادة الوزراء الاستقلاليين باستثناء قادة دارو بصمة فالتاريخ الحكومي والسياسي، بحال الوزير الراحل الوافا والقيادي بوستة .

مزور، مشا لفنلندا يتفطح يومي 25 و26 ماي، على رأس وفد اقتصادي هام ضم ممثلين عن الاتحاد العام لمقاولات المغرب ورؤساء مقاولات مغاربة، وبحضور سفير الملك بفنلندا محمد أشكالو.

الزيارة عرفات سلسلة اجتماعات عمل مكثفة مع كبار المسؤولين الفنلنديين، من بينهم وزير التجارة الخارجية والتنمية فيل تافيو، ووزير الشغل ماتياس مارتينن، ووزير الشؤون الاقتصادية ساكاري بويستو، إلى جانب زيارة ميدانية لميناء فوساري للاطلاع على بنيته التحتية اللوجستية والاستراتيجية.

هاد الزيارة فوقت الأزمة ممكن تأجل، كان خص تدخل وزارة التجارة، باش نذكروه راه سبق له صرح فلجنة برلمانية بلي تواصل مع الاسواق الممتازة باش يخفضو الاسعار ويأثرو على السوق الوطنية واخا هادشي ماشي قانوني ، فسياق ازمة غلاء دولية.

نفس الوزير، سبق قال بلي السلطات المعنية خدامة على قانون حماية المستهلك. فيناهو وعلاش تعطل، ومن غير هادشي فين تعديل مدونة التجارة. وزير لحد الساعة، وفق مصادر حكومية قريبة منو، راه عاجز عن ايجاد الحلول ومدارش مبادرات، من غير اطلاق تصريحات اعلامية فوقت سابق زاد تسببت ف الازمة وخلقات مشاكل للوسطاء للي معندهم علاقة بالشناقة. يعني فقاعات اعلامية لأهداف انتخابية.