بنكيران مغامرش بالتقاعد ديال 7 مليون وها للي ترشح بلاصتو.. و"زعيم الكوفيين" للي دار تصريحات ضد مستشار سيدنا ازولاي وخون زملاء صحفيين ترشح فسلا الجديدة والمفاجأة ترشح الخلفي فدائرة الموت فالرباط .

مصدر الصورة

كود الرباط//

رسميا، حسمت الأمانة العامة لحزب العدالة والتنمية، النقاش الداخلي مركزيا وحتى محليا (سلا)، حول امكانية ترشيح عبد الاله بنكيران للانتخابات المقبلة من مدينة سلا، المعقل التاريخي الانتخابي ديالو.

امانة البي جي دي خدات قرار بترشيح كمال الكوشي، موظف بمجلس النواب، وعندو مواقف معتدلة وكذلك علاقتو مع الصحافيين مزيانة بزاف وكان من القلائل للي دعمو بنكيران فاش وقع البلوكاج، وما ختارش يمشي مع تيار الاستوزار والمصالح مع العثماني.

عدم خوش عبد الإله بنكيران الانتخابات التشريعية المقبلة، حسم وضعيتو المالية، خاصة ما يتعلق بالمعاش الاستثنائي الذي يستفيد منه منذ مغادرته رئاسة الحكومة. بحيث اذ ترشح بنكيران للبرلمان وربح مقعد، كيعني ان المعاش للي كيستفدو منو غايمشي ليه. دبا لا غايبقا لي التقاعد.

دائرة سلا المدينة هي المعقل الانتخابي التاريخي، لبنكيران، حيث فاز بمقعد برلماني لعدة ولايات متتالية سنوات 1997 و2002 و2007 و2011 و2016، ما يفتح الباب أمام احتمال عودته إلى المؤسسة التشريعية للمرة السادسة.

المفاجأة الثانية فسلا، هي ترشيح عزيز هناوي، زعيم الكوفيين فالبي جي دي، دار تصريحات مسيئة وتحريضية ضد مستشار سيدنا اندري ازولاي، فقط لأنه يهودي لا غير. كما انه دار حملات شنعاء ضد زملاء صحفيين مغاربة فقط عبروا عن اراء مؤيدة للتطبيع مع اسرائيل في اطار الاتفاق الثلاثي بين الرباط وواشنطن وتل ابيب وللي وقعو سعد الدين العثماني رئيس الحكومة السابق قدام سيدنا.

ثالث المفاجآت، هي ترشيح مصطفى الخلفي، ف دائرة المحيط، هي دائرة الموت بالعاصمة، يعني خلا التيران ل ولد زروال ف سيدي بنور فاش كيترشح تاريخيا. الخلفي غايواجه الوزير البامي بنسعيد ، ويمكن بنعبد الله يلا قرر يترشح.
يشار بلي هاد الدائرة كان ترشح فيها العثماني وبنعبد الله، الانتخابات الماضية وخسرو خسارة كبيرة شعبياً وانتخابيا.