وزارة الفلاحة: الكسيبة وصلات لـ40 مليون والعرض غادي يفوت الطلب فالعيد الكبير ديال هاد العام .

منذ

كود – الرباط//

وزارة الفلاحة هاد العام قالت باللي العرض ديال الحوالا والماعز دلعيد الكبير 2026 كافي باش يلبّي الطلب ديال المغاربة وبالشياطة.

الوزارة وضحات فبلاغ صحفي اليوم 14 ماي 2026، باللي عدد الريوس المخصصة لعيد الأضحى كيتراوح ما بين 8 و9 دالمليون راس، أما الطلب المتوقع غايكون ما بين 6 و7 د المليون.

وهاد الوضع جا، حسب الوزارة، بفضل البرنامج الملكي ديال إعادة تكوين القطيع الوطني، مع الشتا الكتيرة لي صبات والظروف المناخية، وزيد عليها الولادات ديال الخريف والربيع، اللي ساهمو كاملين فاسترجاع توازن القطيع الوطني اللي وصل دابا لـ40 مليون رأس.

ومن جهة أخرى، تسجلات 160 ألف فيرمة خاصة بتربية وتسمين الحوالا والماعز المْوجهة للعيد، وهاد العملية كتدخل فإطار تتبع مسار الكسيبة ومراقبة الحالة الصحية ديالها.

وبخصوص صحة القطيع، أكدات مصالح “أونسا” باللي الحالة الصحية مزيانة على الصعيد الوطني، وأن المراقبة مازال متواصلة فمختلف الجهات، سوا على مستوى العلف، الأدوية البيطرية، ولا حتى مياه الشريب الخاصة بالكسيبة.

وحتى لـ12 ماي 2026، دارت “أونسا” كثر من 3275 عملية مراقبة ميدانية، خداو فيها عينات من اللحوم والأعلاف والمياه والأدوية البيطرية باش يدوزوها للتحاليل، كيف ما تسجلات 10 المحاضر فحق بعض المخالفين.

كما زيرات السلطات على نقل البزق ديال الدجاج، بنظام ترخيص مسبق من المصالح البيطرية، باش يمنعو أي استعمال غير قانوني له فتسمين الكسيبة.

وباش يوجدو أكتر نقاط البيع فالمدن، دار 35 سوق مؤقت خاص ببيع البهايم فعدد من البلايص فالمملكة.