السغروشني: "شات بوت" ذكي ناطق بالأمازيغية جاي فالطريق ولكن ورش لقينا فيه صعوبات وهادو هما الأسباب .

منذ

كود الرباط//

أكدت أمل الفلاح السغروشني، وزيرة الانتقال الرقمي وإصلاح الإدارة، أن الوزارة غادية ف مسار رقمنة اللغة الأمازيغية، ولكن هاد الطريق مشوكة بزاف ديال التحديات التقنية اللي خلات الوتيرة تكون تقيلة شوية مقارنة بالعربية والفرنسية.

السغروشني، أمام لجنة مراقبة المالية العامة بالبرلمان، اليوم، كشفت بلي كاين فريق تقني خدام حالياً على مشروع “شات بوت” (Chatbot) ذكي ناطق بالأمازيغية. هاد المشروع كيهدف لتسهيل تواصل المواطنين مع الإدارة، ولكن الوزيرة كانت صريحة بلي “الماكينة” مازال خاصها الخدمة.

الوزيرة حطات النقط على الحروف بخصوص الأسباب اللي مخليا سرعة الإنجاز ناقصة منها نقص “الداتا” المكتوبة بحيث المشكل الأساسي هو قلة المحتوى الأمازيغي المكتوب رقمياً، وهادشي كيخلي أنظمة الذكاء الاصطناعي تلقى صعوبة ف التعلم.

ثاني العراقيل، هي تحديات لغوية تقنية بحيث كاينين معيقات مرتبطة بطبيعة اللغة ف التعامل مع البرمجيات، وهي اللي كتحاول الوزارة تحلها دابا.

وباش ماتبقاش الأمور واقفة، علنات السغروشني بلي كاين تنسيق مباشر مع المعهد الملكي للثقافة الأمازيغية (IRCAM) والأمانة العامة للحكومة. الفكرة هي إطلاق أبحاث علمية متخصصة تقدر تعطينا حلول تقنية كتناسب خصوصية اللغة الأمازيغية، وتسمح بتطوير تطبيقات ذكية كتجاوب مع احتياجات المغاربة.

الوزيرة شددات على أن الوزارة ديجا دارت بزاف ديال الورشات واللقاءات وأنتجات مضامين بالأمازيغية، ولكن الطموح اليوم هو الانتقال لمرحلة “الذكاء الاصطناعي” باش تكون الأمازيغية لغة فاعلة ف الإدارة الرقمية ديال غدا.