من بعد سنين ديال الأبحاث.. شجرة الأركان دخلات للمنظومة الفلاحية العصرية و10 آلاف هكتار منها تغرسات ف 3 الجهات .

مصدر الصورة

كود – أگادير//

المغرب غادي يدخل مرحلة جديدة فإنتاج زيت الأركان، بعدما علنات الوكالة الوطنية لتنمية مناطق الواحات وشجر الأركان أن أولى كميات “الأركان الفلاحي” غادي تبدا تخرج ابتداءً من الصيف الجاي، وهاد الشي لأول مرة فالمملكة، المشروع جا من بعد سنوات ديال البحث العلمي والتجارب اللي خلات شجرة الأرگان تنتقل من شجرة غابوية لنمط فلاحي عصري ومنظم.

وجا هاد الإعلان وسط فعاليات الدورة السادسة لليوم العالمي لشجرة الأركان واختتام المؤتمر الدولي للأرگان فمدينة الصويرة.

لطيفة اليعقوبي أكدات بلّي هاد الإنجاز ما كانش غادي يتحقق بلا التعاون بين الفلاحين والمهنيين والتعاونيات، خصوصاً العيالات القرويات اللي عندهم دور كبير فهاد القطاع، كيف ماضافت أن الابتكارات العلمية ولات اليوم واقع اقتصادي ملموس كيعطي نتائج على الأرض.

النجاح ديال المشروع مرتبط ببرنامج “تنمية زراعة الأركان فالمناطق الهشة”، اللي تدار بشراكة مع الصندوق الأخضر للمناخ، وقدر يغرس أكثر من 10 آلاف هكتار ديال الأركان الفلاحي فجهات مراكش آسفي، سوس ماسة، وكلميم واد نون.

وحسب معطيات الوكالة، استافد من البرنامج 5300 فلاح، من بينهم كثر من 1600 مرا قروية، كما وصلو المْشاتل المعتمدة الـ67، واللي كيوفرو أنواع محسنة جينياً من الأركان الفلاحي،كيفما تم بناء 115 بلاصة لتجميع مياه الأمطار بطاقة كتفوت 23 ألف متر مكعب لضمان السقي قوقيتة الجفاف.

الأبحاث العلمية اللي رافقات المشروع خلات نمو شتلات الأركان يطلع بنسبة وصلت لـ220 فالمية بفضل تقنيات التسميد الجديدة، وهاد الشي سرّع الإنتاج فمدة قصيرة مقارنة مع شحال هادي، زيد عليها الجانب الاقتصادي، وحتى الدراسات بينات أن الأركان الفلاحي كيساهم فحماية البيئة بتخزين كميات مهمة من الكربون والحفاظ على التنوع البيولوجي، الشي اللي ممكن يحل للمغرب باب الاستفادة من أسواق الكربون الدولية مستقبلاً.