موظفو المحكمة الابتدائية فكازا فوقفة احتجاجية لوهبي: راه لبرغوت فالبيروات .

مصدر الصورة

ومطالب بتدخل عاجل ورقمنة العدالة بسبب تعتر ديال ملفات لمواطنين..

أميمة عطية كود كازا ///

احتجو موظفو لكونفدرالية الديمقراطية للشغل، اليوم الثلاثاء ، قدام المحكمة الابتدائية فكازا، على الظروف الصعيبة اللي كيخدمو فيها داخل أكبر محكمة فالمغرب.

وفهاد السياق وفي تصريح خاص ل “كود” ، كالت فريدة بوقوح، المنتدبة القضائية والكاتبة ديال النقابة الديمقراطية للعدل بالمحكمة المدنية فرع الدار البيضاء، بلي لوضع داخل بيروات ماشي ملائم نهائياً لخدمة وبلي 10 سنين ولموظفين معدبين، وكالت أن لمكاتب عامرين ب “لبرغوت” والاختناق بسبب الضيق وزحام، وغياب شروط لبسيطة بحال طواليط.

ووضحات، لكاتبة ديال النقابة، بلي مشروع إعادة هيكلة المحكمة متعطل هادي أكثر من 10 سنين، وهاد الشي خلا الموظفين يعيشو “معاناة يومية”، خاصة مع النقص الكبير فالموارد البشرية، اللي حملات فيه المسؤولية لوزارة العدل بسبب تقليص التوظيف.

وزادت ضافت، بلي الوضع ما كيتماشىش مع طموحات إصلاح العدالة ف 2026, وبخصوص المحكمة الرقمية، أكدت بوقوح بلي هاد المشروع كبير وكان مطروح فإصلاح منظومة العدالة من 2012، وكانت وعود بتنزيلو، ولكن مازال ما تطبقش بالشكل المطلوب، رغم أهميتو فالتسريع ديال الملفات وتقريب العدالة للمتقاضين.

وشددات بلي التأخر فتنزيل الرقمنة كيشكل عرقلة حقيقية، خصوصاً مع التراكم الكبير ديال القضايا وقلة الموارد البشرية، وهاد الشي كيعطل بزاف ديال الملفات المهمة.

وفالأخير، وجهات بوقوح رسالة مباشرة لوزير العدل عبد اللطيف وهبي، طالبتو فيها بالتدخل العاجل لإنصاف موظفي أكبر محكمة فالمغرب، وتحسين ظروف العمل ديالهم، وتسريع الإصلاحات وتنزيل المحكمة الرقمية، باش يقدرو يخدمو فظروف مريحة ويقدمو خدمة كتليق بالعدالة فـ“مغرب 2026”