كلشي مسؤول على الشغب ومدان. العصبة الفاشلة والأندية تتخبى وخايفة من الالتراس والسلطات ما قادراش تنظم الدولة. راه لحباسات ماشي حل. علاش ما ينقصوش للاندية اللي جمهورها يدير الشعب النقاطي وعلاش ما يمنعوش منع كلشي هادوك المشاغبين وعلاش ما يديروش "فان ايدي" فكل الاندية .

مصدر الصورة

مصطفى الشاذلي – گود سبور//

عرات احداث الكلاسيكو بين الجيش الملكي والرجاء الرياضي البارح الخميس فتيران مولاي عبد الله، الفشل الكبير للعصبة الوطنية الاحترافية والأندية والمجتمع المدني والأسرة والمدرسة والسلطات المحلية والحكومة باش يلقاو حلول لظاهرة الشعب، واللي ولات عادة عند جماهير فرق البطولة، والأكثر من هذا الشي ولاو كايعتابرو المضاربات والصداع دفاع على الفرقة واللوگو.

اليوم مرة اخرى بان فشل العصبة الاحترافية فتدبيرها لهذا الملف هي والأندية وراه الفراقي مسؤولين من الرؤساء ومكاتبهم المنتخبة حتى للمنخرطين واللعابا، واي واحد عندو علاقة بالكورة وفاعل فيها فهو مسؤول وعندو نصيب من الإدانة فهذا الشي، العصبة خاصها تاخذ قرارت جريئة وحازمة ضد الشغب وباركا من الشعارات التافهة، خاصها تخرج قوانين تعاقب بها الفراقي اللي جمهورهم دار الشغب بحرمانهم من نقاط الماتش اللي لوقع فيه المشكل وينقصو لهم من الرصيد اللي عندهم، وخاصها تصدر قوانين تعاقب بها اي مشجع ارتكب شي فعل داخل فالشغب بحال منعو من الدخول للتيرانات لمدة من الوقت على حسب الفعل اللي دار ويكون هذا الحرمان حتى لمدى الحياة إلى دار شي شغب صعيب، وهاكذا غادي يوليو يخافو المشجعين من انهم يتحرمو من التيرانات وهادوك اللي حصلو فالشغب غادي يتهناو منهم الملاعب.

اما الاندية راهم گاعما مسوقين تجاه هذا الجمهور وعلاقتهم بهم حدها التيران ونهاية الماتش، وهذا الشي ماشي معقول وما بقاش مقبول، راه الاندية خاصها تمشي فالهيكلة اليوم قبل من غدا وتدمج هاد المشجعين عندها ماشي يبقاو برا، وتقلب على مستثمرين يخلقو فضاءات خاصة بالمشجعين وتكون فيهم أنشطة موازية للكورة فين يقدر هذا المشجع اللي ماشي منخرط يلقى فين يبدل الجو ويخرج هاديك الطاقة اللي عندو فبلاصة ما يخرجها فالتيران بالتهراس، ومنها يقدم لهم النادي دروس توعوية للتحسيس بظاهرة الشغب وان التشجيع حدو 90 دقيقة وملي كايسالي الماتش صافي كايسالي الحماس وان جمهور الفريق الاخر هو منافس ماشي خصم، وطبعا هذا الشي حيث المجتمع المدني ضعيف وما قدرش يفرض راسو باش يحارب هاد الظاهرة، والاكتفاء بدور المتفرج والندوات الموسمية البعيد كل البعد على المشجع والالتراس.

اليوم هذا الشي ديال الشغب ما بقاش مقبول فالتيرانات المغربية، وخاص الاندية المغربية والعصبة الاحترافية يواكب العصر وما يبقاوش متخلفين باش الجمهور حتى هو يمشيو معهم فالنيفو، وفكرة Fan ID اللي كان باغي يطبقها محمد بودريقة الرئيس الأسبق واللي تشد فالحبس على افير خاصها تمشي للقضاء الإداري ماشي، المهم راه Fan ID وسيلة مهمة وناجعة لمحاربة الشغب، باش أي واحد دخل للتيران اللي هو فضاء عمومي يتعرف شكون هو وشنو كايدير واش جاي يدير، واللي حصل داير شي حاجة يتعاقب بالمنع من حضور ماتشات فرقتو ومن الدخول فگاع الملاعب لمدة محددة توصل لمدى الحياة على حساب شنو دار، والمشجع اللي ما بغاش هذا الشي ما يجيش للتيران، حيث باركا من ما نبقاو نرقعو بحلول بينت الفشل ديالها رياضيا ومجتمعيا وهذا الفصل 507 اللي ما قدرش يقضي على هاد الظاهرة، بل العكس غير كايدخل به بنادم للحبس كمشاغب ديال الكورة وكايخرج مجرم باغي يدير افعال جرمية كبر وخطر من الشغب اللي كان كايدير فالتيران.

راه وصلنا دابا لواحد الوقت اللي ما بقاش مسموح فيه الرجوع للوراء، امام وضع اجتماعي فيه الهشاشة والتخلف وقلة الوعي كايلقى فيه الرجاوي والودادي والعسكري والمصاوي والكوكابي وغيرهم من المشجعين التيران متنفس لهم فيهم كايخرجو هاديك الطاقة السلبية اللي راكموها السيمانا كاملة بالغوات والزهو فالڤيراج، ايوا دابا راه خاص العصبة الاحترافية والأندية يواكبو العصر باش يطلعو النيفو مع هاد المشجعين اللي هما فاعلين فالكورة ورأسمالها بغينا ولا كرهنا، وماشي يخليو اجهزة الدولة فمواجهة مباشرة مع الألتراس حتى كايولي الحل الأمني والاعتقالات هو الخيار الوحيد اللي كاين، حيث ملي كايتفاقم الوضع راه التدخل الامني كايبقى الحل الوحيد للسيطرة على الشغب وهذا الشي ما بقيناش باغيين نشوفوه.

وبالرجوع لماتش الكلاسيكو بين الجيش الملكي والرجاء الرياضي، راه عرف هفوات تنظيمية سوا بخصوص الطريقة اللي كايتم ادخال بها الجمهور للتيران او ملي كايبغي يخرج وهذا الشي راه كايتعاود بزاف ديال المرات، وخاص التعامل مع المشجع على انه إنسان جاي للملعب ماشي كمرتكب شي فعل جرمي، زيادة على هذا الشي كلشي عارف العداوة بين جمهور الجيش الملكي وجمهور الدار البيضاء، ايوا كيفاش الجمهور ديال الرجا البارح فالتيران ما كانش عليه حزام امني قوي كيفما موالف كايكون فهاد الماتش، علاش الحاجز الأمني كان خفيف وكيفاش تم التساهل مع مشجعين الجيش الملكي حتى وصلو لجهة الرجاويين وبدات الاستفزازات بيناتهم، واللي تطورت حتى طاح هذاك الگرياج ديال الزاج، وعلاش ما كانتش خطوة استباقية لتفادي الكارثة قبل ما توقع ملي قربو مشجعين د ليفار لجهة الرجاويين، وكان التدخل حتى وقعت الاشتباكات بين الجمهورين، وراه الامن كان ديما مجتهد فهاد الشي وما كانش كايغفل عليه وكان سباق لتطويق الفريق الضيف دخل الملعب بحزام أمين متين وهذا الشي ما كانش البارح فالكلاسيكو.

المهم الشغب اللي كايبقى يتعاود فماتشات البطولة راه حنا كاملين مسؤولين عليه ومدانين بسبابو، وبين أننا فشلنا فشل دريع كصحافة رياضية كايطغى عليها التعصب بعيدة عن نقل الاحداث بالحياد، وعصبة وطنية لكرة القدم الاحترافية وأندية بعاد كل البعد على مواكبة العصر والتعامل مع الجمهور كمستهل مؤقت علاقتهم به حدها الماتش وماشي دائمة مع العلم انها راه العكس، وفشلو يلقاوه حلول عصرية وقوية وناجعة وكايتخباو بحالهم بحال المجتمع المدني والأسرة والمدرسة، ومخلين السلطات فمواجهة مباشرة مع جمهور الكورة.

كاينة تجارب اوربية بحال الهوليگانز فالنگليز اللي قضاو عليه البريطانيين بالخدمة. بالعقوبات. بالتنظيم. دابا تهناو من الظاهرة. علاش ما تعلموش منهم