الكاتبة العامة للاتحاد التقدمي لنساء المغرب ل “كود” فاليوم العالمي للعمال : كنطالبو الحكومة تفرض الاتفاقية الدولية 190 ضد التحرش الجنسي فالخدمة والعنف فات الحدود .

مصدر الصورة

أميمة عطية – كود كازا ///

حيى الاتحاد المغربي للشغل، اليوم الجمعة 1 ماي ، ومعاه الاتحاد التقدمي لنساء المغرب بجهة الدار البيضاء-سطات، فاتح ماي، كعيد أممي ديال الشغيلة، في كازا ، وسط سياق اقتصادي واجتماعي صعيب كيتسم بارتفاع الأسعار وضغط متزايد على الطبقة العاملة، وخصوصاً لعيالات اللي ولاو دور رئيسي داخل الدورة الاقتصادية .

وفي هاد السياق ، وفي تصريح خاص ل ” كود” ، كالت طباري رشيدة، الكاتبة العامة للاتحاد التقدمي لنساء المغرب بجهة الدار البيضاء-سطات ، إن فاتح ماي “ماشي غير مناسبة احتفالية، ولكن هو محطة باش نرجعو نأكدوا على الدفاع على حقوق العمال والعاملات، وعلى راسهم لمرا العاملة اللي كاتعيش ضغط كبير بسبب الغلاء وتدهور القدرة الشرائية”.

وأكدت ، لكاتبة لعامة ، أن من بين أهم لمطالب ديالهم هو مواجهةلغلا فـ الأسعار، والدفاع على حقوق وحريات العمل والنقابات، معتبرة أن لوضع الحالي كيزيد يضغط على فئات واسعة من المجتمع، وعلى لمرا .

وفهاد الإطار ، دعت رشيدة طباري لحكومة إلى لمصادقة على الاتفاقية الدولية رقم 190 التابعة لمنظمة العمل الدولية، والمتعلقة بمحاربة العنف والتحرش في فلخدمة بلعيالات، وشارت على أن هاد لخطوة ضرورية باش يتم ضمان حماية حقيقية للمرأة داخل بيئة الشغل.

وفي ما يخص لعنف الإلكتروني، وضحات طباري ، أن لمرا ولات كتعرض لهجمات زايدة على مواقع التواصل الاجتماعي بحال فيسبوك وإنستغرام، ووصفت هاد الظاهرة بأنها “فاتت الحدود” وولات تمس الكرامة ديال المرأة بشكل مباشر.

وضافت أن هذا النوع من لعنف ما بقاش مقبول، وكيأثر على المرأة العاملة بشكل خاص وعلى المرأة المغربية بشكل عام، مطالبة بضرورة إدخال قوانين صارمة داخل الشركات والمؤسسات باش يتم معاقبة كل من يسيء أو يمارس العنف الرقمي، ووضع حدود واضحة لحماية الكرامة ديال لمراوات.