مول الحانوت والحرايفي المغربي كيدخلو بقوة فالحوار السياسي ديال "مسار المستقبل " بالتجمع الوطني للأحرار بكازا .

مصدر الصورة

أميمة عطية – كود كازا //

نظم التجمع الوطني للأحرار، يوم السبت 25 أبريل بالدار البيضاء، لقاء تواصلي داخل فضاء مكتب الصرف، وذلك فإطار سلسلة لقاءات “مسار المستقبل”، بحضور عدد كبير ديال التجار والحرفيين ومهنيي الصناعة التقليدية من مختلف مناطق المغرب.

هاد اللقاء جا باش يتم فتح النقاش مع هاد الفئات على قبل المشاكل والتحديات اللي كيعانيو منها، وطرح حلول واقتراحات باش يتطورو هاد القطاعات الحيوية فالإقتصاد الوطني.

وبدا اللقاء بالنشيد الوطني، ومن بعد خذا الكلمة أحمد الصلح، رئيس المنظمة الوطنية للتجار التجمعيين، اللي رحب برئيس الحزب محمد شوكي ، والحاضرين من ممثلي الغرف المهنية والشخصيات الاقتصادية، و حوالي 1500 تاجر وصانع تقليدي.

وقال الصلح باللي هاد اللقاء داخل فإطار “مسار المستقبل”، وكيعكس توجه الحزب فالإنصات للتجار والمهنيين باش احولو ملاحظاتهم وانتقاداتهم ل سياسات عمومية قابلة للتنزيل.

واعتبر أن هاد الحضور الكبير كيبعث رسالة سياسية واقتصادية واضحة حول أهمية هاد الفئة فدعم الاقتصاد الوطني، ب قيادة عزيز أخنوش، وأكد أن الحكومة “حكومة إنجازات وأفعال”.

وزاد كال أن الحكومة قدرات تعالج عدد من المشاكل،وقوات مفهوم الدولة الاجتماعية، خصوصاً من خلال تعميم التغطية الصحية على التجار والمهنيين، وهادشي رجع لهم الكرامة والاعتبار، حيت ولى التاجر شريك أساسي فبناء الوطن، خصوصاً “مول الحانوت” اللي لعب دور مهم ف جائحة كورونا فضمان التموين واستقرار السوق.

ودعا فهاد السياق إلى وضع سياسات عمومية واضحة ومنصفة لهاذ الفئة، من بينها إعداد مدونة شاملة للتجارة، وإصلاح منظومة التراخيص، وتقنين التجارة الإلكترونية، ومحاربة الاحتكار، و إلى دعم تجار القرب، وإعادة هيكلة الغرف المهنية باش تولّي عندها أدوار حقيقية فالتكوين والتأطير.

و شدد على ضرورة تمثيلية التجار والمهنيين داخل الهياكل الحزبية باش يكونو شركاء حقيقيين فصناعة القرار.

ومن جهتو، كال قدوري محمد، رئيس غرفة الصناعة التقليدية لجهة الشرق ، إن قطاع الصناعة عرف تطور مهم فهاد العامين، وحقق نتائج إيجابية، من بينها ارتفاع الصادرات وتحسن الإنتاج، و إحداث السجل الوطني للصناعة التقليدية اللي سهل تنظيم القطاع واستفادة المهنيين من التغطية الصحية والتقاعد.

وأكد أن الصناعة التقليدية كتساهم فالحفاظ على التراث المغربي، وكتوفر فرص الشغل والتكوين والتسويق، مع حضور متزايد ديال المنتوج المغربي فالسوق العالمية، وشار أن هاد المكتسبات كتتماشى مع الرؤية ديال الملك محمد السادس، ملك البلاد .

وختم بالتأكيد أن القطاع عرف تطور مهم كيرفع من مكانة الصناع التقليديين وكيخدم التنمية الاقتصادية والاجتماعية فالمغرب