نظم الاتحاد الديمقراطي المغربي للشغل، هاد الصباح مع مواطنين، وأطباء فنقابة ، وقفة احتجاجية قدام سبيطار 20 غشت، وهوما ساخطين على الاختلالات اللي كيعرفها.

وفي هاد السياق، كال مصطفى لكحيل، الأمين العام للنقابة، فتصريح خاص لـ”كود”، باللي الواقع ديال السبيطار “كلشي كيعرفو فكازا”، وكلشي دوا عليه، نقابة لا حقوقيين لا مجتمع مدني لا مواطنين.

ووضح أن هاد الوقفة عندها بزاف ديال الأهداف، منبينها التضييق على الحرية النقابية اللي كيتعرضو ليها الأطر الصحية داخل المركز الاستشفائي، واللي وصفها بغير قانونية.

وزاد أن ل كفاءات لكتخدم المواطنين وصالح العام، خصوصاً داخل الأقسام، كتعاني من حصار حيت باغيين يخدمو المواطن بنية صادقة،.

وكال ان وزارة الصحة والحماية الاجتماعية ما كتجاوبش على الشكايات اللي كيتقدمو بها باش يتصلح هاد المنظومة، وكيستفسر علاش ؟

وبخصوص واحد الشكاية توصلات بها “كود”، على حالة مريض لقا “لاسانسور” خاسر فالسبيطار واضطر يهبطو لمريض فالدروج باش يدير “ليريم”، كال باللي

فضح الفساد ضروري، وخصنا نعرفو فلوس هاد اللاسانسور فين مشات، وفلوس معدات كثيرة خاسرة وأدوية ما كايناش، وهادشي حق من حقوق المواطن، وضاف ان بن رشد معروف بهالشي .

وطالب بربط المحاسبة بالمسؤولية، وطالب أن وزير الصحة خاصو تكون عندو الجرأة السياسية ويهبط يحاسب المسؤولين فكازا، بحال مدن أخرى، وختم بالقول: “وزير صحة خاصو يكون قبيح فالحق ويجي لكازا ونفرحو به”.

من جهة أخرى، وضح الدكتور شرقاب، طبيب الإنعاش والتخدير ومسؤول فالمكتب التنفيذي للنقابة، فتصريح لـ”كود”، أنه جا لهاد لوقفة كإطار صحي ومواطن باش يندد بالاختلالات اللي كيعرفها سبيطار 20 غشت.

وأكد أنهم دارو شكايات ولكن حتى لجنة تحقيق ما جات من 2024، وضاف أنه كطبيب كيشوف باللي هاد الشكايات كتهم المواطن المغربي والبيضاوي بالخصوص، وأنهم باغيين الإصلاح، خصوصاً وأن “كلشي دوا على هاد السبيطار فالبرلمان وحتى حد مبغى يسمع”، متسائلاً علاش كازا، باعتبارها أكبر مدينة، ما تستافدش بحال القنيطرة وأكادير.

و تطرق لحالة موظف تعرض لطرد تعسفي منذ 2012 ومازال ما خداش حقو من الإدارة، و عرقلة تنفيذ ديالا حكم قضائي ديالو وبغا انصافو .

وختم ، شرقاب تصريحو وطالب وزير الصحة أمين التهراوي، بصفتو رئيس المكتب المديري ديال المركز الاستشفائي ابن رشد، باش يوفد لجان تفتيش لكازا حيت الوضع “مكرفص”، ويرجعو حق الموظف المتضرر، مؤكدين أنهم كأطباء مستعدين يوريو للوزير كاع المشاكل باش تلقى حلول ويتم إصلاح المنظومة الصحية على أساس صحيح.