22 ابريل 2026 يوم للتاريخ فالثقافة المغربية. افتتاح المسرح الملكي بالرباط. افتتاح هاد الايقونة الهندسية وهاد الابداع المعماري مهم لحاضرنا وتاريخنا الثقافي المعماري الحضاري. عليه كلشي فيه كان مدروس.

سيدنا فهاد الافتتاح بين احترامو للمرأة ودفاعو عليها وتشديدو على ان للمرأة دور كبير وبزاف فبناء المغرب حاضر ومستقبل. كيفاش؟ هاد الشي بدا باش تم التفكير فالمشروع. فكرات فتصميمو مرأة مبدعة ملهمة اللي هي المهندسة المعمارية العالمية العراقية زاها حديد. داك الشكل اللي كتشفناه البارح من الدخول للفضاء حتى تصميم الكراسى والتموجات والانعراجات المشكلة للفضاء كلها استعادة للمرأة لجسدها لروجها لعبقريتها.

سيدنا كان حريص باش مرأة مبدعة بحال زاها حديد هي اللي تشرف على المشروع. المسرح الملكي اليوم من غير جماليتو الخارجية الواعرة، غادي يخلي المغرب يدخل ثقافيا لمرحلة اخرى.

فالافتتاح البارح كانت هاديك الاستمرارية فتكريم المرأة المغربية. فالتدشينات اللي كيحضروها الامراء والاميرات، راه الملك اللي كيحدد شكون يحضر. سيدنا ختار 3 الاميرات. بنتو الاميرة لا خديجة وخواتاتو الاميرة لالة مريم والاميرة لالة حسنا وكانت معاهم بريجيت ماكرون مرات الرئيس الفرنسي ايمانويل ماكرون.

ايلى كان حضور لالة حسنا بالصفة لانها رئيسة مؤسسة المسرح الملكي، فحضور لالة مريم وخاصة الاميرة لالة خديجة عندو معاني كثيرة. مغرب المستقبل. الصورة الرسمية اللي خرجات لهاد الحدث للاميرات الثلاث وبريجيت ماكرون كتخلص هاد الشي. مغرب قوي هو مغرب فرحان بحاضرو فخور بماضيه ومتطلع لمستقبلو

حضور بريجيت ماكرون ماشي مجاني. من غير انو تكريم للمرأة راه تكريم لسيدة لعبات دور كبير فعودة العلاقات المغربية الفرنسية. كانت كما قال الطاهر بنجلون فبرنامج عن المغرب ف”فرانس 5″ صاحبة الدور الحاسم فاقناع زوجها الرئيس ماكرون الاعتراف بمغربية الصحرا وعودة العلاقات الى سابق عهدها بعد فترة جفاء.

حتى البرمجة الفنية لليلة الافتتاح كان التفكير فتكريم لمرا. المايسترو للاوكسترا يا قائدتو هي مرا وهي عازفة البيانو دينا بنسعيد. اللي ادات مقاطع من الابداعات الكلاسيكية هي الميزو سوبرانو المغربية الفرنسية حليمة محمدي. ابدعت وامتعت. اللي قدمات تراث عربي اندلسي هي سميرة القادري

كانت المرأة حاضرة بين 76 عازف وعازفة ديال الاوركسترا الفيلارمونية والاوركسترا السيمفونية الملكية كما كانت حاضرة بين 40 مغني ومغنية كورال البارح.

كلشي تفكر فيه باش تكون ليلة ملكية تحتفي بالمرأة المغربية.