الشطط فاستعمال السلطة بمنطقة اولاد فريحة بالبروج حرك لجنة تفتيش من الداخلية لعمالة سطات وها التفاصيل .

منذ

مصطفى المزابي -كود سطات//

كشفات مصادر “كود”، أن وزير الداخلية عبد الوافي لفتيت رسل لجنة تفتيش البارح الثلاثاء لمقر عمالة سطات، باش تبحث في قضية شطط فاستعمال السلطة بطلها القايد ديال قيادة اولاد فريحة بدائرة البروج .

وأضافت المصادر ذاتها، أن عمل لجنة التفتيش انكب على التحقيق فقضية شبهة اعتداء القايد على عون سلطة وخلاه بوحدو في الخلا، حيث تم استدعاء المعنيين بالأمر من طرف عمالة سطات من أجل الاستماع إليهم من طرف أعضاء لجنة التفتيش للوقوف على حقيقة الأمر، وكذا التحقيق في واقعة حمل القايد لسلاح ناري عبارة عن بندقية صيد، ودامت مدة الاستماع ليهم اكثر من 4 ساعات .

تفاصيل هاذ الفيلم لي حرك وزارة الداخلية، كيرجع ملي تقدم لمقدم بشكاية إلى عامل إقليم سطات وضح فيها أن القضية بدات

بمشادات كلامية بين المقدم والقايد، وبأن القايد كان هاز لقرطاس ومعاه جوج د الناس فطوموبيل، كانو كيقلبو على مخالفة ديال حفر بئر فمنطقة أولاد فريحة بني مسكين الغربية، من بعد سخنات الهضرة وولات تهديد ووعيد وحتى تعنيف فحق المقدم، من بعد ناض القيد ركب معاه المقدم اوداه لبلاصة خاوية وبعيدة على النفوذ ديالو وخّلاه تماك، الأمر لي خلا المقدم يضرب ساعة كاملة ديال الطريق على رجليه حتى وصل عند شي مسؤول اللي عيط للجهات المختصة.

مصادر “كود” قالت، بلي عمالة سطات سبق لها أن استدعت مجموعة من المقدمين والشيوخ واستمعت ليهم وحتى القايد ومن بعد العامل ارسل تقرير لوزير الداخلية لي صيفط لجنة تفتيش للتحقيق في الأمر.