شهادة لفقيه حميدة رجعات الصراع على عرش الزاوية البودشيشية للواجهة..ومصادر ل"گود": الشيخ الروحي دبا هو معاذ البودشيشي وخدام فصمت .

مصدر الصورة

كود الرباط//

تسريب جديد زاد شعلها فالزاوية القادرية البودشيشية، رجعات ملف الخلافة للواجهة من جديد، خصوصا فشقه المرتبط بالوصية اللي كيستند عليها منير القادري.

هاد التسريب هو شهاد الفقيه حميدة القادري بودشيش، واحد من الوجوه اللي عايشات تفاصيل الوصية عن قرب، عاشر كبار شيوخ الطريقة، وعلى رأسهم الشيخ حمزة.

فهاد الشهادة، الفقيه حميدة القادري كشف حقيقة الوصية وبلي الشيخ د الزاوية اللي خصو يكون هو معاذ القادري ماشي خوه منير.

شهادة حميدة كتعتبر وسط المريدين مرجعية، خصوصا وأنه عايش أكثر من 70 عام من تاريخ الطريقة، وواقف على بزاف ديال المحطات الحساسة فالمسار ديالها.

وهاد المعطى خلا الشهادة ديالو تعاود تطرح تساؤلات كبيرة حول الروايات اللي كانت كتروج بخصوص الخلافة.

وتزاد الجدل مباشرة من بعد وفاة الشيخ جمال فغشت 2025، ملي خرجات وصية كتعين الابن الأكبر خلفا ليه، وهي الوثيقة اللي اعتمد عليها منير القادري فالدفاع على الأحقية ديالو فالمشيخة.

لكن هاد الوصية، حسب معطيات متداولة داخل الزاوية، توقعات فظروف صحية حرجة، وهو ما خلا بزاف ديال الأصوات تطرح علامات استفهام حول مدى تعبيرها الفعلي على إرادة الشيخ الراحل.

المعطيات الجديدة كتبين كذلك أن مضمون هاد الوصية ما كينسجمش مع تصورات كانت معروفة على الشيخ حمزة بخصوص الخلافة، واللي كانت كتربطها أكثر بالشروط الروحية والتربوية، ماشي بالوراثة المباشرة.

فهاد السياق، ولات وضعية منير القادري أكثر تعقيد، خصوصا مع تزايد التشكيك فأساس الخطاب اللي كيعتمد عليه، ومع بروز شهادات مضادة جاية من داخل نفس البيت البودشيشي.

المؤشرات الحالية كتوحي أن الزاوية القادرية البودشيشية كتمر من مرحلة دقيقة فالتاريخ ديالها، حيث النقاش ما بقاش محصور داخليا، بل ولى موضوع اهتمام أوسع داخل الأوساط الصوفية.

وفهاد الإطار، كتشكل شهادة الفقيه حميدة نقطة تحول، رجعات النقاش للأساس ديالو، وربطات مسألة الخلافة بمعاييرها التقليدية المرتبطة بالأهلية الروحية.

الشيخ معاذ القادري، للي خدام ف صمت وهو كيتعتبر الشيخ الروحي للزاوية غادي بخطى ثابتة بعيدا عن الصداع في ارجاع الزاوية لسكتها الى حين تبان الحقيقة كاملة ديال الوصية، وفق المصادر.