على غرار المعهد الملكي للإدارة الترابية منين كيتخرجوا القياد خاص شي معهد آخر منين يتخرجوا المنتخبين، راه مل سيمانة مشدود شي منتخب بالفساد بينما رجال الداخلية لا، إذن السر كاين في المدرسة منين كيتخرجوا .

مصدر الصورة

محمد سقراط-كود///

الى جينا نقارنوا بين عدد المتابعين في ملفات الفساد بين المنتخبين ديمقراطيا عن الأحزاب السياسية وبين المسؤولين ديال الداخلية القايد والباشا والعامل .. ألخ، راه من المفروض نقاطعوا الانتخابات أو نصوتوا غير على القياد والعمال والولاة، حيت كاين واحد التباين كبير بزاف حتى في الاثر ديال التسيير على الساكنة، وكاين اختلاف في الشكل والمستوى الدراسي والتكوينات، باش تكون قايد راه ضروري تكون قاري بعدا وعندك شهادة جامعية، وعندك طول ولياقة بدنية، أما منتخب سياسي راه يمكن تكون شبه أمي مريض وتولي تسير جماعة او مستشار فيها، بالاظافة الى كيفاش ولات الانتخابات وتسيير الانتخابات ملجأ للفاسدين، فتح أي موقع إخباري غادي تلقى متابعة شي مرشح سياسي أو الحكم عليه، آخرهم شبكة امبراطور تازة، مدينة مهملة منسية وزاد هاد المسير ضيع عليها وعلى الدولة ملايير ديال بصح مشات في الفساد والنهب.

هادشي راه كيعطل المغرب يلحق غير بالدول لي كانت متخلفة بحالو ، اما الدول المتقدمة غير نسى مستحيل يلحق حيت مكتف راسو وداير الخاطر لشعيبة وهرگاوة، الفساد ديال المسؤولين والمنتخبين سم كيقتل المغرب عرق بعرق، وكيخلي گاع المبادرات والبرامج الاقتصادية تمشي غير في الخوى وتكون نتيجتها ضياع الفلوس والوقت، راه هذا عمر أجيال كيضيع، ملي خرج الاستعمار والمغاربة كيحسو براسهم حاصلين في البلاد وباغين يهاجروا، وبزاف منهم كيحاولوا عام بعد عام حتى كيكبروا ويفقدوا الامل ويبقاو معانا هنا على شكل زومبي، دابا حاليا كاين شباب كتخلص عشرة دالمليون باش تمشي لأوروبا كاين مناطق خواو من الشباب كولشي يا حرگ يا مات وهو يحاول، وفي نفس الوقت كاين منتخبين كيتصرفوا في مالية جماعات ومدة وكيتاخدوا قرارات لي كتزيد تساهم في تأخر البلاد على الركب.

على غرار المعهد الملكي للإدارة الترابية منين كيتخرجوا القياد خاص شي معهد آخر منين يتخرجوا المنتخبين، مايمكنش يكون الواحد بلا مؤهلات بلا شهادات والى صوتات عليه قبيلتهم يولي يسبر جماعة وبرلماني على المنطقة، ويبدى يتصرف في ميزانية جماعة ويتاخد قرارات كتأثر على حياة دوك الناس وحياة ولادهم، الانتخابات مابقى عندها معنى وولات عبئ على المغاربة وعلى البرامج التنموية، واش دابا المغرب واش كتمارس فيه السياسة والبرامج الحزبية والتوجهات السياسية الواضحة، هادشي مكاينش للأسف وعمرو كان، اذن راه خاصوا يتصلح أو يتطوع ليتلائم مع شنو حنا دابا، اما الى بقات الأمور هاكا راه يقدر فشي انتخابات مستقبلية تكون نسبة التصويت زيرو.